E Samschdeg war den LSAP-Deputéierten eisen Invité an der Emissioun Background am Gespréich um Radio.

Hie war Minister, Chamberpresident a sëtzt elo als Deputéierte vun der LSAP an der Chamber. De Mars Di Bartolomeo war dëse Samschdeg bei eis am Background.

Background am Gespréich integral als Audio!

Mam Rapporter vun de Covid-Gesetzer a President vun der Kommissioun, déi un der neier Verfassung schafft, ginn eis d’Sujeten net aus. Hien ass och Member an der Logements-Kommissioun a säin Numm steet fir d’Pensiounsrevisioun.
Hien hätt léiwer gehat dass och den Onofhängege Gewerkschaftsbond mat am Boot wär, sot de sozialisteschen Süddeputéierten. Hien, dee selwer OGBL-Member ass, empfënnt den Accord awer als zolidd. D'Haltung vun der Gewerkschaft wollt de Mars di Bartolomeo net kommentéieren. Et wier awer net fir d'éischt, datt et zu Ausernanersetzungen komm ass tëscht OGBL an LSAP, beispillsweis bei der Pensiounsreform. D'Gewerkschaft hätt hir Roll ze spillen. Wann eng sozialistesch Partei an der Regierung ass misst se no engem Equiliber sichen. Dass d’Kannergeld elo indexéiert bleift, wann am August eng Indextranche sollt erfalen, wier net méi wéi richteg.

Hie géif dovunner ausgoen, datt d'Kannergeld an der Tripartite net um Radar war, sou de Mars di Bartolomeo. Dat wier schonn erstaunlech, awer u sech eng gutt Saach.

Datt d'LSAP an déi Gréng beim Tripartite-Accord gekuscht hunn, wier "Quatsch", huet eisen Invité betount. Déi sozial Parteien hätten hei hire Match gemaach. Wann den Accord sou schlecht wier, géif e wuel och net vun der CSV matgedroe ginn.

Dass d’Kannergeld elo indexéiert bleift wier eng gutt Saach.  Sollt eng Indextranche am August erfale géif dat Kannergeld och normal indexéiert ginn.

An der Diskussioun mam fréiere Gesondheetsminister ass een natierlech net laanscht d'Gestioun vun der Covid-Kris komm. Et wier guer net anescht gaangen, wéi séier ze reagéieren. D'Chamber hätt all Zäit gewisen, datt se ganz séier schaffe kann. Den Hoke bei der Pandemie ass dass een definitiv net weess wéi et weider geet. Duerfir misst een an de verschiddenen Hypothesen weider plangen an den Hierscht preparéieren. Stéchwuert Impfflicht. Impfen wier eng Biergerflicht, sou de Mars di Bartolomeo.

De Mars di Bartolomeo versteet dass de Leit hier Gedold esou lues um Enn ass. Et heescht awer weider opzepassen. Eng Deel-Impfflicht ass op alle Fall net ausgeschloss esou de Mars di Bartolomeo.

Op nationalpoliteschem Plang war et d‘Fro op d‘Paulette Lenert Premierministesch wäert ginn. Do sot den Invité dass et gutt wier wann emol eng Fra hei am Land op dee Poste kënnt an och aus de Reie vun der LSAP, eng Partei déi an enger seelener Opbrochstëmmung wier.

Dass déi fréier Ministere Krecké a Schneider trotz Ukrain-Krise ze laang un hiren décke Posten bei russeschen Entreprise festgehalen hunn ass fir de Mars di Bartolomeo een „No-Go“.

D'Emissioun Background am Gespréich vun dëser Woch gouf am Virfeld opgeholl.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.