Den Encevo-Direkter, de FEDIL-Industriepolitk-Chef, den Energieminister an de SOLER-Direkter waren eis Invitéeën an der Emissioun Background am Gespréich.

Zu Lëtzebuerg preparéiert ee sech op den Eeschtfall. Jidderee gëtt opgeruff, Energie ze spueren.

Déi véier Invitéeën an der Emissioun Background halen et fir warscheinlech, dass de Wladimir Putin de Gaskrunn vun der gréisster Gas-Pipeline Nordstream 1 no de Revisiounsaarbechten, déi e Méindeg uginn, guer net méi opdréint. Konsequenz wär eng Knappheet an Europa, confirméiert den Energieminister Claude Turmes.

D'EU probéiert, d'Gasspäicher bis spéitstens November op en Niveau vun 90 Prozent ze fëllen. Den Ament wären d'Gas-Reserven op eppes iwwer 60 Prozent. Se géife wéi geplangt gefëllt ginn, esou den Direkter vun Encevo Claude Seywert. Ma et wéisst een net, wéi et virugeet.

Op der Bourse respektiv um Grousshandel ass de Gaspräis am Verglach mat Mëtt Juni elo ëm 75 Prozent an d'Luucht gaangen. Duerch e komplette Stopp géifen d'Präisser nach emol klammen. Um Enn och fir de Konsument. "D'Präisser ginn net erof", sot den Direkter vun Encevo, ouni d‘Hausse ze chiffréieren. D'Clientë mussen awer weider mat méi héije Rechnunge rechnen.

Aktuell gi sech Gedanken driwwer gemaach, wéi Lëtzebuerg géif op eng Knappheet reagéieren.

Et gëtt e sougenannten "Plan de délestage" fir Gas, dee vun engem Comité ausgeschafft gouf an am Februar dëst Joer ënnerschriwwe gouf. Den Ausgangszeenario war dofir en Accident, net e komplette Liwwerstopp. Regierung an d'Unioun vun der Lëtzebuerger Industrie FEDIL schaffen un engem adaptéierte Plang. D'EU-Kommissioun mécht Recommandatiounen.

Industrie bei Manktem u Gas net protegéiert

Anescht wéi Privatstéit oder nach Spideeler a Schoulen ass d'Industrie net protegéiert. Industriell an handwierklech Betriber, déi ronn Zweedrëttel vum Gas zu Lëtzebuerg verbrauchen, kréichen am Eeschtfall als éischt manner.

De Gaston Trauffler vun der Fedil sot am Background, et wär een fir eng relativ gläichméisseg a flexibel Opdeelung tëscht den Entreprisen. Soubal Gas knapps géif ginn, sollt all Entreprise nach Gas kréien, esou vill wéi se es wierklech brauch.

Allerdéngs produzéiere Fabricke manner, wa se gedrosselt funktionéieren: dat hätt en Impakt op de PIB, deemno op de Wuesstem vum Land, a verschidde Produite géife méi rar an doduerch méi deier ginn. D'Inflatioun géif klammen.

Appell fir Gas ze spueren

De Claude Turmes huet dofir den Appell un d'Leit gemaach, och doheem Energie ze spueren, fir dass d'Industrie weider funktionéiere kann.

Stroum spuere géif vill hëllefen, well e groussen Deel dovu mat Gas produzéiert gëtt. Deemno wier et sënnvoll elo am Summer zum Beispill d'Klimaanlagen net ze vill an ze staark lafen ze loossen, esou den Appell vun den Invitéen.

Déi beschten Energie wier déi, déi net gebraucht géif ginn. Eleng wann ee méi spéit am Wanter d'Heizung Doheem ëm 1 Grad erofdréint, géif dat am Schnëtt scho ronn 6 Prozent Energie spueren, esou den Direkter vu Soler Paul Zeimet.

Op energie-spueren.lu fënnt een Tipper an Tricken ewéi een Energie spueren kann.

Erneierbar Energien ausbauen

De Claude Turmes gesäit an deem brutale Krich ee positiven Aspekt. Déi ganz EU wär sech eens, dass d'Erneierbar Energien nach méi ambitiéis ausgebaut solle ginn, fir sécher onofhängeg vu Russland ze ginn. Esouguer elo och déi skeptesch ëstlech Memberstaaten.

Den Direkter vu Soler Paul Zeimet spiert, dass d'Akzeptanz fir Wandrieder bei de kommunale Responsabelen a bei der Populatioun an dëser extremer Situatioun wiisst.

Duerch déi streng Oploe wéinst dem Natur- an Déiereschutz dauert d'Konstruktioun zwar méi laang wéi an Däitschland zum Beispill. Ma doduerch wär ee forcéiert, och an den technologesche Fortschrëtt z'investéieren. Bei der Wandenergie bräicht een zum Beispill ronn een Drëttel manner Wandrieder wéi fréier, fir déi selwecht Quantitéit un Energie ze produzéieren, wéi de Paul Zeimet betount.

De Claude Seywert schléisst sech un. Encevo plangt weider Investitioune vun enger Milliard Euro pro Joer wouvun e groussen Deel an d‘erneierbar Energien virop d‘Solarenergie goe géing.

Dem Gaston Trauffler vun der Fedil no huet d'Industrie net op dëse Krich misste waarden, fir sech ëmzestellen. Zanter Jore géifen do fräiwëlleg Efforte gemaach ginn, well d'Energiekäschten och fir d'Betriber eng grouss Laascht sinn.

Déi energetesch Transitioun geet an der Industrie awer virun allem iwwer d'Elektrifizéierung vun der Wiermt. Haut gëtt d'Hëtzt mat Gas gemaach. An Zukunft sollt se mat erneierbarem Stroum kënne produzéiert ginn.

Background am Gespréich vum 9. Juli 2022

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.