E Samschdeg war déi nei Mobilitéits- a Verdeedegungsministesch eis Invitée an der Emissioun Background am Gespréich um Radio.

Nei Erausfuerderungen zéien sech duerch hire Liewenslaf. Nom Finanzministère déi lescht zwee Joer huet d‘Yuriko Backes an dëser Regierung d‘Ressorte vun der Mobilitéit, den Travaux Publics, der Defense an der Egalitéit iwwerholl. Si war dëse Samschdeg Invitée an der Emissioun Background.

Background am Gespréich vum 13. Januar - Yuriko Backes
E Samschdeg war déi nei Mobilitéits- a Verdeedegungsministesch eis Invitée an der Emissioun Background am Gespréich um Radio.

Virun hirer politescher Karriär war d‘Yuriko Backes Hofmarschall. An dat wär si wuel och nach ëmmer, wa si net gefrot gi wier, fir an d‘Regierung ze goen. Si hätt do eng ganz wichteg Reform op de Wee bruecht a géif och weider suivéieren, wat esou um Haff geschitt.

"Ech wëll iwwerall higoen an alles gesinn"

Ech wëll iwwerall higoen an alles gesinn, a mat jidderengem schwätzen, esou d‘Ministesch. Si wier ganz „hands on“ wann et dorëms geet sech an en neien Dossier oder en neit Thema eranzeschaffen. Fir si wier et dowéinst och wichteg gewiescht bei d‘Zaldoten op den Terrain ze goen. Engersäits fir sech e Bild vun hirer Aarbecht ze maachen, mä och als Zeeche vu Solidaritéit fir déi Männer a Fraen am Asaz. Lëtzebuerg hätt eng Roll ze spillen an der Ofschreckung, an do kéinte mir net nëmmen investéieren, mä missten och „boots on the ground“, also Zaldoten um Terrain, hunn, esou déi nei Defenseministesch.

Defense an den Investissement doranner ginn ëmmer méi wichteg

Fir eis ze verdeedegen wiere mir an enger Allianz an dowéinst misste mir hei och eisen Apport leeschten. Mir brauchen d‘Nato, dat wier haut méi kloer, wéi nach virun e puer Joer. Aktuell géif doru geschafft ginn e Lëtzebuergesch-belsche Batailloun op d‘Been ze stellen. Dat wier net evident, mä am Nato-Kontext immens wichteg. D‘Obligatiounen an der Nato géif si ganz eescht huelen. Do wier scho vill geschitt an de leschte Joren, ma dat misst weidergefouert ginn. Déi Suen, déi investéiert ginn, sollten awer „gescheit“ investéiert ginn, esou dass et esouwuel als “Effort de défense” unerkannt gëtt, mä dass et och en Apport ass fir Lëtzebuerg.

Lëtzebuerg brauch nei Zaldoten an Zaldotinnen

Si huet och wëlles un enger Rekrutementscampagne ze schaffen. Et géifen nach vill Leit gebraucht ginn. Dofir misst d‘Arméi och en attraktiven Employeur sinn, mat interessanten Aarbechtsplazen. D'Profiller, déi an der Arméi gesicht ginn, hätten sech an de leschte Joren och verännert, notamment mat der Cybersécherheet, déi ëmmer méi wichteg gëtt. Beim Rekrutement vun de Fraen wier awer nach vill Loft no uewen. Aktuell ginn et 12 Prozent Frae bei der Arméi.

Militärsatellit Luxseosys gëtt wuel d’nächst Joer mat Space X erop geschoss

De Militärsatellit Luxseosys, iwwer dee scho vill geschwat gouf, well d’Käschten explodéiert sinn, wier prett, ma et bräicht een eng Rakéit fir en an de Weltall ze kréien. Do misst ee warscheinlech op Space X zréck gräifen. D’nächst Joer wäert dat warscheinlech de Fall sinn.

Regierung huet net wëlles de Bewäertungssystem bei der Arméi ofzeschafen

D‘Ministesch fënnt et schwiereg, dass d'CGFP eng Streik-Prozedur lancéiert huet, wéinst dem Sträit ronderëm de Bewäertungssystem an der Arméi. Dee Promotiounssystem wär ni ogeschaf ginn. An d’Regierung hätt och absolut net wëlles en ofzeschafen. An hiren Aen wier et och immens wichteg, dass d‘Kompetenzen vun de Militär evaluéiert ginn. Si hätten eng enorm Verantwortung. Hei géif et ëm Liewen an Dout goen an do misst ee sécher sinn, dass déi Leit dës Responsabilitéite kënnen huelen.

Mobilitéit an der Kontinuitéit a multimodal denken

D‘Konzept vun hirem Virgänger fir d‘Mobilitéit multimodal ze denken, géif bleiwen. Gläichzäiteg misst een d‘Nohaltegkeet promouvéieren a sech bei der Digitalisatioun besser opstellen. D‘Offer misst un d‘Besoinen vun haut a muer ugepasst ginn. Et géif vill parallel lafen.

Fir d‘Frontalieren géif een ënnert anerem op Park-and-Riden setzen. Aktuell ginn et 19.000 Plazen, där sollen nach 9’000 derbäi kommen a Lëtzebuerg finanzéiert och Projeten am noen Ausland mat. D'Yuriko Backes ka sech och virstellen, eng Spuer fir Fuergemeinschaften op den Autobunnen ze maachen. Et misst een awer och kucke wéi een dat kontrolléiert a sanktionéiert. Ënnert anerem sollen och d'Zuchkapazitéite ausgebaut, d‘Quaie méi laang gemaach an déi international Verbindunge méi attraktiv gemaach ginn.

De Vëlo wier ganz wichteg, ma et misst nach vill gemaach ginn, zum Beispill a Punkto Vëlosparkplazen. Si wéilt nei Vëlosweeër plangen, ma och déi vun hirem Virgänger bauen. Hei missten och nach méi Efforte gemaach ginn, dass sech jiddereen sécher spiert. Aktuell géifen dowéinst nach vill manner Fraen am Alldag Vëlo fueren, wéi Männer.

Nach dëst Joer am Juli wäert den Tram vu Bouneweg bis bei den neie Stadion op Gaasperech fueren. Enn des Joers/ugangs d’nächst Joer sinn déi zwou weider Statiounen vum Kierchbierg bis op de Findel fäerdeg.

“Ech fannen genderen ganz wichteg”

D’Yuriko Backes ass och nei Ministesch fir Gläichstellung an Egalitéit. Datt nëmme 5 Fraen an der Regierung sinn, fënnt si natierlech net gutt. Mä et misst ee sech och d’Fro stellen, firwat dat esou ass. Genderen fënnt si perséinlech ganz wichteg. Et kéint net sinn, datt just de männlechen Terme benotzt gëtt. Et misst een déi ganz Gesellschaft uschwätzen.

Gëtt si nei Ausseministesch, wann de Xavier Bettel op Bréissel geet?

De Xavier Bettel gëtt jo ëmmer nees genannt fir nächsten EU-Conseilspresident ze ginn. Gëtt si dann nei Ausseministesch? Déi Fro géif sech den Ament net stellen, sou d’Yuriko Backes. Et wär ganz positiv, datt de Xavier Bettel fir dee Poste gehandelt gëtt. Si hofft awer, datt en der Lëtzebuerger Politik erhale bleift. Si wéilt och gäre mol en Job wärend 5 Joer maachen an net just fir eng kuerz Zäit.

Background am Gespréich vum 13. Januar

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU an um RTL Play zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.