En Donneschdeg de Moie konnt Dir eis live op RTL Radio Lëtzebuerg Är Meenung soen an Är Froe stellen.

Dir hutt d'Wuert iwwer Impfungen - De Replay vun der Emissioun

6.261 Dosen Vaccin sinn e Mëttwoch iwwerdeems an de 5 Zenteren am Land gesprëtzt ginn. 2.684 Leit kruten hir 2. Dosis.

Eppes iwwer 100.000 Leit kruten ewell schonn eng éischt Dosis vun engem Vaccin, dat 107 Deeg nom Ufank vun der Impfcampagne am Land, an ronn 37.000 Leit kruten déi zweet.

Leider wier een an der Situatioun, dass een den Ament net kéint de libre choix ginn, fir ze decidéieren, wéi ee Vaccin dass ee wëll, well net genuch Impfstoff vun allem do ass.

Wann eng Persoun e Vaccin refuséiert, ka se sech nach emol op eng Lëscht aschreiwen loossen, sot um Donneschdeg de Moien an eiser Emissioun "Dir hutt d'Wuert" de Comissaire à la protection nationale, de Luc Feller.

Fir datt e bestëmmte Vaccin net agesat gëtt, muss et beim Patient kloer Contre-Indicatioune ginn, esou den Dokter Jean-Claude Schmit.

Den Dr. Jean-Claude Schmit

Wat e Mix vum éischten an zweeten Vaccin ugeet, huet den Direkter vun der Santé Jean-Claude Schmit erkläert, dass et nach keng Etüd géif ginn, déi beleet, dass doduercher méi eng effikass Immunitéit opgebaut géif ginn. Franséisch Experten hate rezent de Conseil ginn, dass dat an der franséischer Impf-Strategie soll gemaach ginn, also dass een als zweet Dosis en anere Vaccin soll kréien, wéi bei der éischter Dosis.

Zu engem bestëmmten Zäitpunkt wier et iwwerdeems virgesinn, dass och d’Hausdokteren kéinten e Corona-Vaccin sprëtzen. Den Ament wier dat awer nach net ëmzesetzen, well e Stockage-Problemer géif ginn, op Grond vun der spezieller Kill-Technik déi di aktuell Vaccine brauchen.

Op d’Fro hin, wéini Kanner kéinte geimpft ginn, huet den Dr. Jean-Claude Schmit geäntwert, dass do Etüden um Lafe wieren. Et rechent een, dass ee fir de Summer do méi wéisst, an da warscheinlech och fir déi Jonk kéint mat de Vaccinatiounen ufänken.

Et géif een iwwerdeems gutt gesinn, dass d’Impfungen bei den eelere Generatiounen schonn e positiven Impakt hunn. Et géif nämlech manner positiv Fäll bei eelere Leit optrieden a virun allem manner schwéier Krankheetsverleef bei Leit aus där Alterstranche ginn.

Gewëss Niewewierkunge an den éischte puer Deeg kënnen normal sinn, sou de Medezinner Schmit.
Wann d'Symptomer awer unhalen, soll ee sech beim Hausdokter mellen. Op alle Fall wier et net ze recommandéieren, fir Bluttverdënner ze huelen.

Et sinn immens vill Froen erakomm, leider konnten net all d'Froen an der Emissioun beäntwert ginn.