En Donneschdeg de Moie konnt Dir eis live op RTL Radio Lëtzebuerg Är Meenung soen an Är Froe ronderëm d'Impfflicht a Covid-19 stellen.

Bal 99% vun de Corona-Doudege wieren iwwer 50 Joer al. Dowéinst wier eng Impfflicht fir méi Jonker net onbedéngt justifiéiert. An eng Impfflicht am Santés- a Fleegesecteur, wou mat Vulnerabele geschafft gëtt, géif am meeschte Sënn maachen. Dat huet den Dr Gérard Schockmel, Spezialist fir Infektiounskrankheeten, an onsem "Dir hutt d'Wuert" en Donneschdeg de Moien ënnerstrach.

Mat den aktuelle Vaccine wier ee gutt op all d'Corona-Variante preparéiert, fir e schwéiere Krankheetsverlaf z'evitéieren. Dat wier nämlech d'Haaptzil vun der Impfung an dowéinst wier eng Grondimpfung wichteg. Datt et ëmmer nees zu Boosteren, also reegelméissegen Impf-Rappeler misst kommen, mengt den Dr Schockmel net. 3 Impfunge wieren als eng komplett Impfung ze gesinn. Domadder wier eng Basis-Immunitéit opgebaut an déi géif duergoen. Doriwwer eraus wier eng Corona-Infektioun bei Geimpften eppes wéi e Booster. Deen Ament géif ee vun enger Hybrid-Immunitéit schwätzen.

Impfgéigner huet den Dr Schockmel erkläert, datt d'Kollektiv-Recht iwwert dem Individualrecht géif stoen an eiser Gesellschaft. Dowéinst dierft de Kollektiv net wéinst Eenzele beschnidde ginn. Dowéinst géif eng Impfflicht Sënn maachen. D'Paxlovid-Medikament wier och keen Ersatz fir eng Impfung, well den Immunsystem hei eigentlech net gefuerdert, also net gestäerkt géif ginn.

Dir hutt d'Wuert mam Dr Schockmel

Eng Partie Froe goufe live an der Emissioun thematiséiert, hutt awer w.e.g. Versteesdemech, datt aus Zäitgrënn net ëmmer all d'Froen drukomme konnten. Merci!