D'gratis Kannerbetreiung an déi non-formell Bildung waren e Freideg de Moie Sujet an onsem "Dir hutt d'Wuert".

Den Educatiounsminister Claude Meisch war live bei eis am Studio.

"Dir hutt d'Wuert" mam Claude Meisch

Ee Sujet, deen ëmmer nees opkoum: Méiglech Kompensatioune fir Elteren, déi op d'Offer verzichten an doheem bleiwen, fir hir Kanner ze erzéien. De Claude Meisch huet geäntwert, hie wier zoustänneg fir Educatioun an all deem ronderëm zoustänneg, mee a puncto Familljepolitik- a Steierpolitik géingen et jo och Hëllefe ginn.

Bei enger bestueter Koppel, wou just ee schaffe geet, ass d'Steierlaascht jo méi kleng. Mat de verschiddene Variante vum Congé parental hätten Elteren awer och genuch Méiglechkeeten, fir sech adequat ëm hir Kanner ze bekëmmeren. De Minister huet och gewarnt, datt dat hei dacks eng ideologesch Debatt wier.

Ma hie misst Politik maachen an enger Welt, wéi se eben haut ass. An do missten Elteren dacks zu zwee schaffe goen. Dowéinst misst een eng gutt Kannerbetreiung ubidden, déi iwwert eng einfach Betreiung eraus geet an och eng reell Bildungsleeschtung ass.

D'gratis Kannerbetreiung vun der nächster Rentrée u wäert awer net just fir Maison-relaisen a Foyer scolaire gëllen, mee och Dageseltere kéinte matmaachen, esou de Educatiounsminister Claude Meisch. Soulaang ee sech un den "non-formale Bildungsplang" hält, wier dat am Beräich vun de scolariséierte Kanner méi einfach, ewéi fir Kanner, déi nach an dCrèche ginn, sou de Claude Meisch. Allerdéngs géing de Ministère och dru schaffen, fir am Klengkand-Beräich den Dageseltere Perspektiven ze schafen.