En Dënschdeg de Moie war d'Presidentin vun Anil, der Associatioun vun den Infirmièren an Infirmieren eis Invitée vun der Redaktioun.

”Et muss ee scho soen, dass d’Zäit ëmmer méi knapp bemooss ass, fir d’Aarbecht mam Patient”. Dat sot d’Anne-Marie Hanff en Dënschdeg de Moien als eis Invitée vun der Redaktioun.

D’Presidentin vun der ANIL, der Associatioun vun den Infirmièren an Infirmieren sot dass de Betreiungsopwand ëmmer méi grouss géif ginn.

D’Dokumentatioun vun den Traitementer géif vill Zäit ewech huelen, an hei kéint een eventuell ëmdenken. Wann de System anescht opgestallt wier, wier och méi Zäit fir de Patient do, sot d’Anne-Marie Hanff. Et kéint ee sécherlech vill Ofleef vereinfachen, wann d’Strukturatioun anescht wier.

D’Presidentin vun der ANIL huet och drop higewisen, dass et vläicht misst en Ëmdenken an der Ausbildung vun den Infirmieren misst ginn. Aktuell si just 10% vun de Concernéierten, déi an den nationale Spideeler schaffen hei am Land forméiert ginn. Hei kéint een vläicht schonn an de Schoulen ufänken, anescht virzegoen, fir nees méi Jonker an de Beruff ze kréien. D’Bild vum Infirmier wier heiansdo leider net dat Allerbescht, dobäi wier de Beruff ganz villfälteg, a kéint och weider ausgebaut ginn, well d’Potential nach laang net ausgenotzt wier, sou d’Anne-Marie Hanff.

AUDIO: Invité vun der Redaktioun: Anne-Marie Hanff

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.