E Mëttwoch de Moie war den CSV-Parteipresident Frank Engel eisen Invité vun der Redaktioun.

"T’ass mer net einfach gefall nozelauschteren an ech war frou, wéi et eriwwer war." Sou jugéiert den CSV-President Frank Engel den Etat de la Nation vum Premier vun en Dënschdeg.

Hie géif dervunner zeréckbehalen, dass bal alles an der Ried gefeelt hätt, wat u sech dra gehéiert hätt, sot hien e Mëttwoch de Moien als Invité vun der Redaktioun.

Et wieren eenzel Saache beschriwwe ginn, mä konkret Propositiounen hätt et iwwerhaapt keng ginn. De Wunnengs- a Wuesstemsproblem, dee momentan kruzial an der Populatioun wier, wier beispillsweis ignoréiert ginn.

Wann ee keng Propositioune mécht, da kéint een d’Ried zur Lag vun der Natioun och ofschafen, fënnt den CSV-President.

Als komplett un den Hoer erbäigezunn, fënnt de Frank Engel och d'Behaaptung vum Etienne Schneider, dass een him proposéiert hätt, fir eng CSV-LSAP-Koalitioun ze forméieren. Hie fuerdert de Vize-Premier dann och op, bannent den nächste 24 Stonnen ëffentlech ze maachen, wien déi ominéis Persoun soll gewiescht sinn, deen dat gemaach soll hunn. Kënnt keng Äntwert, da géif de Frank Engel mol dervun ausgoen, dass d'Behaaptung gelu wier.

Hie fënnt et och e gelungenen Zoufall, dass d’Nouvelle vun dëser Geschicht grad zu deem Ament koum, nodeems d’CSV just Minutte virdrun eng Pressekonferenz iwwert d’Affär Dieschbourg hat. De Frank Engel schwätzt vun engem méiglechen Oflenkungsmanöver an ënnersträicht, dass d’CSV zu kengem Ament iergendengem eng onmoralesch Offer gemaach hätt.

Invité vun der Redaktioun: Frank Engel

Rendez-vous fir den Interview mam Invité vun der Redaktioun all Dag vu méindes bis freides kuerz no 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.