E Freideg de Moie war de Mëttelstandsminister eisen Invité vun der Redaktioun.

“Déi ganz Regierung ass sech bewosst, datt den Horesca-Secteur muss opgoen an de Päischtweekend ass ee wichtege Weekend fir de Secteur”, esou de Lex Delles. Den DP-Mëttelstandsminister konnt e Freideg de Moien hei op RTL awer nach kee festen Datum confirméieren. Dat gëtt e Méindeg gemaach, wann 3 Wochen no der zweeter Deconfinementsphas ofgelaf sinn. Wéinst der Inkubatiounszäit vun 2 Woche beim Coronavirus huet d’Regierung decidéiert, ëmmer 3 Wochen tëscht de Phase verlafen ze loossen, fir ze kucken, wéi een Impakt Reouverturen op d’Zuel vun neien Infektiounen hunn.

Mat der Reouverture vun de Restauranten, Caféen an Hoteller kommen awer sanitär Oplagen. Et mussen 2 Meter Distanz tëscht zwee Dëscher ginn a wann dat net méiglech ass, dann Trennungen. Et däerfen net méi Leit an d’Caféen a Restauranten, ewéi Sëtzplaze sinn an et däerf ee sech net méi geselleg un de Comptoir stellen. D’Betriber sinn awer net gezwongen d’Nimm vun de Clienten opzeschreiwen, fir am Fall vun Infektiounen en Traçage kënnen ze maachen, sou de Lex Delles. E Risiko krank ze ginn, wann ee lo an de Restaurant oder Café geet, gesäit de liberale Minister net, et misst een eben awer d'"gestes barrière" uwenden.

De Lex Delles presentéiert um Freideg de Moien zesumme mam LSAP Wirtschaftsminister Franz Fayot Detailer iwwert de Mesurëpak „Neistart Lëtzebuerg“, deen e Mëttwoch scho vum Premier Xavier Bettel a vun de Ministeren Gramegna, Kersch a Bausch presentéiert gouf. Iwwert 6 Méint gi finanziell Hëllefen ausgeluecht, fir déi Betriber, déi besonnesch staark vun der Kris betraff sinn. An deem Zesummenhang huet de Lex Delles hei op der Antenn erkläert, datt déi Mesuren, déi elo schonn existéiert hunn, wéi déi 5.000 oder 2.500 Euro fir Independanten, oflafen, wann den Etat de crise eriwwer ass. De Minister huet un d’Independanten, déi nach keng Demande gemaach hunn appelléiert, dat nach ze maachen.

Zur Kritik vu villen Independanten, datt se eng "Hëllef" refuséiert kruten, obwuel se net méi konnte schaffen, huet de Lex Delles erkläert, datt d’Formulairen an eenzele Fäll net richteg ausgefëllt waren an d’Hëllef u Konditioune gebonnen ass, fir „garde-fous“ ze hunn. Ob et géing vum Beamten ofhänken, deen en Dossier traitéiert, ob een eng Hëllef accordéiert kritt oder net, op déi Fro war et d’Äntwert: „doudsécher net“.

Invité vun der Redaktioun: Lex Delles

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.