E Méindeg de Moie war den 1. Stater Schäffen an CSV-Politiker eisen Invité vun der Redaktioun.

Et wier eng speziell Braderie an engem spezielle Joer. Méi kleng, streng Hygiènesmesuren, keen Alkohol an de Stroossen. Et wier alles gemaach ginn, fir de Restriktioune gerecht ze ginn, fir de Covid-Virus ze bekämpfen, esou den éischte Stater Schäffen Serge Wilmes am RTL-Interview um Méindeg de Mueren. Schonn de Weekend wiere vill Leit an der Stad gewiescht.

Bei de Solden hätt een Drëttel vun de Geschäftsleit gutt geschafft, een Drëttel mëttelméisseg, een Drëttel schlecht. D'Braderie wier elo eng Geleeënheet dee Bilan ze verbesseren, mengt de Serge Wilmes.

Sécher géifen d'Geschäfter ënnert der Pandemie leiden. Ma, obschonns vill online kaaft géif, hätten d'Leit awer de lokale Commerce erëm entdeckt. Speziell den Horesca-Secteur hätt gelidden, ma do hätt d'Gemeng villes gemaach, fir ze hëllefen. Zum Beispill goufe méi Terrassen erlaabt, méi grousser a keng Taxe ass dorobber ze bezuelen. D'Leit an d'Restaurateure géifen dat appreciéieren. De Schäfferot wär oppen dofir, dat och no der Pandemie bäizebehalen.

Näischt ersetzt Fouer, sot de Serge Wilmes weider. Déi kleng Kiermessen an der Stad sollen eng Alternativ fir d'Foraine sinn, fir datt si kënne schaffen. D'Recette kéinten ni dat kompenséieren, wat se soss op enger Fouer verdéngt hunn.
D'Foraine wieren awer Deel vum Stater Patrimoine, dee soll lieweg gehale ginn. De Bilan vun dëse Kiermessen wier ënnerschiddlech, jee no Quartier. Si daueren nach bis den 13. September.

Wat Diskussioune ronderëm Aussoe vum CSV-Parteipresident Frank Engel ugeet, do sot de Serge Wilmes, datt dat Bild, wat elo vermëttelt gouf, net dat wier fir dat déi meescht stinn. Déi meescht an der CSV géife sech fir eng Vollekspartei engagéieren, déi matten an der Gesellschaft steet. Déi verschidden Interêten sollen zesumme gehale ginn. Dofir géif d'CSV stoen... fir d'Gesellschaft, fir d'Land zesummen ze halen. Fir e Mateneen, net e géinteneen.

Dat géif besonnesch elo a Krisenzäite gëllen. Vill méi wollt de Serge Wilmes net zu deem Sujet soen.

Invité vun der Redaktioun: Serge Wilmes

Fir Entreprisë weider ze ënnerstëtzen: Rue du Fossé bleift bis 30. September just fir Foussgänger op

Domadder wëlle d'Stad Lëtzebuerg weider d'Entreprisen an där Géigend ënnerstëtzten, ma och eppes fir d'Mobilité douce maachen. U sech war virgesinn, datt d'Strooss den 1. September nees fir den Trafic sollt opgoen.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.