E Mëttwoch de Moie war den Direkter vun der Handelskonfederatioun eisen Invité vun der Redaktioun.

Am Commerce leide verschidde Secteuren nach ëmmer staark, zum Beispill de Beräich Evenementiel an d'Reesagencen.
D'Handelskonfederatioun verlaangt an deem Kontext weider Hëllefsmesuren, seet den Direkter vun der CLC, Nicolas Henckes. Hie war den Invité vun der Redaktioun um Mëttwoch de Moien.

An Éisträich kréiche staark concernéiert Geschäfter eng adequat staatlech Ënnerstëtzung, se kréiche bei de fixe Käschten ewéi zum Beispill Loyeren ënnert d'Äerm gegraff. Och zu Lëtzebuerg kéint een op de Wee goen, fënnt de Nicolas Henckes, den Dialog mat der Politik géing lafen.

Net all d'Secteure sinn also d'selwecht gutt oder schlecht duerch d'Kris komm, derbäi kommen och regional Ënnerscheeder. Zu Esch zum Beispill wier d'Situatioun net gutt, well et och scho schlecht goung virun der Kris.

4 Méint no der Reouverture wieren d'Cliente allzäit nach net ganz erëm, d'Politik hätt de Leit vläicht bëssen ze vill Angscht gemaach, sou den Direkter vun der Confédération du Commerce.

Datt de Grand-Duché vu verschiddene Nopeschlänner op rout Lëschte gesat gouf, hätt och näischt dozou bäigedroen, datt d'Situatioun besser gëtt. Méi Teletravail géing iwwerdeems bewierken, datt d'Leit manner zirkuléieren a manner an de Geschäfter ënnerwee sinn.

Verschidde Butteker hätten nom Lockdown guer net méi opgemaach, bis ewell wieren et där zwar net vill gewiescht, ma et fäert een eng Faillite-Well am Hierscht an am Wanter. Spéitstens am Ufank vum nächste Joer géingen d'Geschäftsleit d'Ofrechnung maachen a gesinn, ob et finanziell raus geet oder net.

D'Stater Braderie wier eng Enttäuschung gewiescht, dat wieren op d'mannst d'Retouren déi d'CLC sou kritt hätt. Verschidde Geschäftsleit hätte par Rapport zu zejoert Abousse vu bis zu 80% gehat, sou nach den Nicolas Henckes.

Invité vun der Redaktioun: Nicolas Henckes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.