En Dënschdeg de Moie war de President vun der CGFP eisen Invité vun der Redaktioun.

D'Restriktioune missten novollzéibar a verständlech sinn. D'Leit missten d'Mesurë verstoen, well da géife se sech och drun halen. Dat sot de President vun der Staatsbeamtegewerkschaft, de Romain Wolff, am RTL-Interview.

Homeschooling an Teletravail si wuel wichteg an dëser Situatioun, se hunn awer och Nodeeler. Zum Beispill wat déi sozial Kontakter ugeet. Dowéinst dierfte se net zur Reegel ginn. Doriwwer eraus misst den Teletravail méi kloer reglementéiert ginn.

En aneren Sujet mam Invité vun der Redaktioun: De Gesetzprojet, duerch deen eng Privatiséierung vum ëffentlechen Secteur gefaart gëtt. Eng Zouso, datt d'Gesetz fale gelooss géif, hätt een nach net. Déi Diskussioun misst zur Chefsaach, also mam Premier diskutéiert ginn. 
Allgemeng wier d'Relatioun mam Minister vun der Fonction Publique Marc Hansen net schlecht, mä se kéint besser sinn. Et géifen einfach Saache vum Dësch gewëscht ginn, esou de Romain Wolff.

Wat de Fuerderungskatalog fir en neie Gehälteraccord an der Fonction Publique ugeet, do sot den Romain Wolff, datt, elo an der Kris, Primmen a Punktwäerterhéijungen net un éischter Stell wäerte stoen.

D'Regierung hätt awer Interêt dorunner, dofir ze suergen, datt ee weiderhin e Staat behält, dee gutt fonctionéiert, ënnersträicht de CGFP-President.

Invité vun der Redaktioun: Romain Wolff

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.