D’Presidentin vun der Fedil, d'Michèle Detaille, huet de Freideg de Moien am RTL-Interview ausgedeelt.

Muss een an der industrieller Politik méi transparent sinn an de Public mat abannen? "Nee", sou déi kloer Äntwert vun der Presidentin vun der Fedil, der Federatioun vun der Lëtzebuerger Industrie. Et kéint een et maachen, sou d’Michèle Detaille, mee da kéim een ni virun. Et géing  "Bla Bla" ginn an Tables Ronden an an 30 Joer géing een nach ëmmer diskutéieren.

D’Michèle Detaille sot, et misst een de kompetente Leit, de Ministeren an hire Fonctionnairen et iwwerloossen, fir Dossieren ze traitéieren. Déi géinge jo kontrolléiert ginn: "Mir hu ganz wéineg oder guer keng Skandaler". D’Presidentin vun der Fedil huet sech dowéinst och ganz kloer géint den Abléck vu Parlamentarier a Kontrakter tëscht dem Staat a privaten Entreprisen ausgeschwat. Datt RTL "gezwongen" gëtt, Deputéierten en Abléck an de Kontrakt tëscht RTL, CLT-Ufa, Bertelsmann an dem Staat ze ginn, dat wier "idiotesch a kontraproduktiv", sou d’Michèle Detaille.

Op d’Fro, ob een am anere Fall net d’Gefill géing ginn, et wéilt een eppes verstoppen, war et d’Äntwert: "Nee". Wa si eppes un e Mataarbechter delegéiert, da wier si net déi ganzen Zäit hannendrun, fir ze kucken, ob en eppes géing klauen oder ob e seng Saach gutt mécht. "Wësst Dir, wou een transparent ass? An Diktaturen.", sou nach d’Vertriederin vun der Industrie. Si ass och der Meenung, et géing och guer kee Sënn maachen, esou Informatiounen u Parlamentarier ze ginn, déi absolut keng Anung hätten.

E gudden Ekosystem, mee…

Déi ganz Diskussioun iwwert d’Transparenz war am Zesummenhang mam Echec vum Projet vun der griichescher Jughurtsfabrick Fage zu Diddeleng/Beetebuerg. Hei huet d’Michèle Detaille ferm kritiséiert, datt d’CSV Fage beim Procureur denoncéiert huet: "Mee wat ass dat fir e Land? Dat gëtt mir guer keng Loscht, heihinner ze kommen."

Kontraproduktiv wieren och der Presidentin vun der Fedil no déi héich Käschten an d’Energiepolitik. D’Land huet nach Industrie an et ass ee Land, wou ee kann investéieren, sou d’Michèle Detaille. "Ech soe just, kommt mer passen op, datt mir net dat verléieren, wat eis interessant mécht." D’Perceptioun, datt de Mindestloun d’Industrie net géing betreffen, well et do just héisch qualifizéiert Aarbechtsplaze géing ginn, wier falsch.

Ee "ganz wichtege" Punkt wier dann d’Energiekäschten. D’Regierung géing der Michèle Detaille no an eng falsch Richtung goen an "éischter ideologesch" Decisiounen huelen ewéi an d’Richtung vun enger Industrie, déi bléie soll.

Impakt vu Covid op d‘Industrie

D'Industrie kënnt bis ewell verhältnisméisseg gutt duerch d'Corona-Kris. Et géingen awer och industriell Beräicher ginn, déi Problemer hunn, ewéi zum Beispill d'Autozouliwwerer. Der Fedil-Presidentin no hätt d‘Regierung awer mat héijen Investissementer gutt gehollef.

Bei de Sozialpläng misst zum Beispill nach méi op Formatioun gesat ginn, amplaz einfach nëmmen op Indemnitéiten. Esou kéinten déi concernéiert Salariéeë weider schaffen a Karriär maachen, sou d’Michèle Detaille.

Op d’Fro, wat d’Fedil zur Fuerderung vun de Gewerkschaften, fir eng national Tripartite ze organiséieren, huet si geäntwert, dat wier keng Prioritéit. Den Ament géing ee sech op d'Kris konzentréieren.

Invité vun der Redaktioun: Michèle Detaille

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.