En Dënschdeg de Moie war de President vun der Autosfederatioun Fedamo eisen Invité vun der Redaktioun.

An der Moyenne wier et e Minus vun 10% bei de Venten um Auto-Festival am Verglach mat zejoert gewiescht. Esou de Bilan vum President vun der Garagisten-Associatioun Fedamo, Philippe Mersch, am RTL-Interview en Dënschdeg de Mueren. Zuelen aus de leschte Woche géifen awer nach feelen, an déi wiere gutt gewiescht.

Positiv wier, datt keng Problemer am Kontext vun de Coronamesurë gemellt goufen.

D'Elektromobilitéit war och e Sujet. 81% vun de Garagë géife soen, datt se méi elektresch Autoe verkaaft hunn, wéi zejoert. Ganz wichteg hei wier d'staatlech Hëllef. An deem Kontext gëtt vun de Garagiste begréisst, datt de politesche Wëllen do wier, dës weider lafen ze loossen.

Datt Hybriden aus deem Programm kéinte geholl ginn, mécht dogéint Suergen. Den Hybrid-Plug-In wier nämlech eng besser Alternativ zum Verbrenner, wéi e rengen Elektroauto. Zum Beispill wann ee wäit muss fueren, oder vill Zuchkraaft brauch, wann een eng Remork misst zéien zum Beispill.

De Mobilitéitsminister François Bausch huet RTL en Dënschdeg am Nomëtteg confirméiert, datt déi staatlech Subside fir den Hybrid-Plug-In nach just bis Enn dës Joers verlängert ginn.

Datt de Verbrennungsmotor keng Zukunft huet, wëll de Fedamo-President Philippe Mersch net ënnerschreiwen. E wäert op d'mannst déi nächst 10 Joer majoritär bleiwen, och wann den Diesel wäert staark zeréckgoen.

Invité vun der Redaktioun: Philippe Mersch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.