E Freideg de Moie war d’Direktesch vun der Fondation Solina eis Invitée vun der Redaktioun.

D’Selbstmordversich wiere wéinst de Coronarestriktioune kloer an d’Luucht gaangen, sou d’Michèle Kridel. D’Direktesch vun der ASBL Solina, Solidarité jeunes, déi Jonker an de Foyer d’accueillë betreit, sot e Freideg de Moien hei op RTL, d’psychologesch Zerwisser an d’Hëllef wieren méi an Usproch geholl ginn.

Hei zu Lëtzebuerg liewen aktuell ronn 780 Kanner a Jugendlecher a Foyeren. Kanner, déi net vill Chance vun doheem aus haten, wou d'Eltere quasi net existent wieren. Si goufen duerch Jugendgeriicht placéiert oder koume fräiwëlleg. Haaptzil wier et awer, si nees heem ze kréien an dowéinst misst och mat den Elteren zesummegeschafft ginn. Déi eng Jonk wieren méi ofgehäert, anerer méi fragiliséiert.

D’Coronakris an d’Restriktioune wieren awer natierlech eng grouss Belaaschtung fir si alleguer. Et gouf och Covid-Infektiounen an engem Foyer d’accueil an „dat muss ee sech emol virstellen“, esou d’Michèle Kridel. Jonker hätte Wochelaang missen eleng op hirem Zëmmer bleiwen. Och wann d’Restriktiounen aktuell deels manner streng sinn wéi am Ausland, wiere se der Direktesch vu Solina no nach ëmmer eng Belaaschtung. Wann zum Beispill 20 Jonker an engem Heem liewen, da kënne se net gläichzäiteg Famill oder Kolleegen ëmfänken.

Déi Jonk hätten Ängschten, géinge sech isoléiert fillen, mä se wieren och desillusionéiert. D’professionell Perspektive wieren net gutt. D’Formatiounen an d’Stagë wieren wéinst der Pandemie net méiglech. D’Michèle Kridel war d’Accord mat der Ausso, datt iwwerdeems de Jugendchômage scho virun der Kris ganz héisch war eng Aart Konjunkturprogramm fir déi Jonk misst kommen „an zwar séier“.

„E Polverfaass“

D’Michèle Kridel ass och op d’Fro agaangen, wéi d’déidlech Messerpickerei ënner Jugendlechen am Januar zu Bouneweg bei deene Jonken opgeholl gouf. D’Direktesch vu Solina, Solidarité Jeunes sot natierlech wieren se „schockéiert“ gewiescht. Et soll een awer oppassen an net verallgemengeren well esou Tëschefäll wieren et scho leider ëmmer ginn.

D’Ängschten an de Manktem u soziale Kontakter wieren awer „een enormen Drock“ ewéi ee „Polverfaass, a bei Jonker déi schonn e bësse fragil waren den Deckel op eemol opgeet. „D’Pandemie huet bestëmmt net positiv dozou bäigedroen, datt esou Saachen net méi geschéien“, sou d’Michèle Kridel.

Invité vun der Redaktioun: Michèle Kridel

D’ASBL SOLINA, solidarité jeunes, huet och en Artikel rezent geschriwwen, mat Temoignage vu Jonken, déi an de Foyers d'accueillë liewen.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.