E Méindeg de Moie war den neie President vum Staatsrot eisen Invité vun der Redaktioun.

D’Mixitéit am Staatsrot stellt sécher, datt verschidde Vuen an d’Avisen afléissen. Am Staatsrot wier eng "gesond Neutralitéit" do. Dat sot de Christophe Schiltz e Méindeg de Moien hei op RTL. Hien ass den neie President vum Staatsrot, der héijer Kierperschaft, déi d’Gesetzprojeten op hir juristesch Konformitéit iwwerpréift.

Datt d’Ex-Fra vum Baupromoteur Marc Giorgetti, d’Martine Lamesch, Member vun der Kommissioun "Nohalteg Entwécklung an Infrastruktur" vum Staatsrot ass, géing dem Christophe Schiltz no net heeschen, datt si d’Interessie vun deem Secteur géing verdeedegen. "Ech weess net, ob dat géing funktionéieren", sou de Christophe Schiltz. Dat selwecht gëllt fir een anere Member vum Staatsrot, de Lucien Lux, deen dem Flavio Becca no steet. De Lucien Lux huet eis géigeniwwer och betount, datt hien net Member vun der zoustänneger Kommissioun ass.

De Christophe Schiltz, ass och LSAP-Member an héije Beamten am Kooperatiounsministère. Dat géing d’Fro vun der Vermëschung vun Executive a Legislative vermëschen, hat Reporter geschriwwen. Den neie President betount, datt et net déi éischte Kéier ass, datt e Beamte Member vum Staatsrot ass. Fir d’Beamten, wéi och fir déi aner Membere wieren d’Reegelen och kloer. „Wa si op iergendengem Dossier virdru matgeschafft hunn (…) da kënne se selbstverständlech bei eis net un den Diskussiounen oder den Ofstëmmungen deelhuelen“, sou de Christophe Schiltz. Reegelméisseg géinge "Kolleegen" vu sech aus matdeelen, datt se net kënnen un engem Avis matschaffen oder wann nëmmen e Verdacht besteet, froen, ob se solle mat dru schaffen.

"Seriö" Analysen trotz manner Zäit

Zanter Ufank vun der Coronakris huet de Staatsrot wéinst de villen neie Reegele besonnesch vill Aarbecht. Et wier awer net esou, datt d’Texter net géingen "seriö" oder "am Detail" gekuckt ginn. De Christophe Schiltz huet awer zouginn, datt wann de Staatsrot Zäit huet, en och Texter proposéiere kann. Duerch déi aktuell Situatioun misst ebe méi séier geschafft ginn. De Conseil d’Etat huet am Sekretariat personell opgestockt an den neie President mengt, „do kann een awer eventuell, mengen ech, nach e bëssen opstocken, fir do nach méi ze hëllefen, Recherche ze maachen a fir d’Dossiere besser ze preparéieren“.

Staatsrot’s next Member

Neiste Member am Staatsrot ass de Marc Meyers, dee vun der DP proposéiert gouf. De Christophe Schiltz sot um Méindeg de Moien, déi nächst Partei déi dru kéim, fir en neie Member ze proposéieren, "kéinten" déi Gréng sinn. D’CSV hat selwer scho gesot, datt et wéinst dem leschte Walresultat net un hir wier. Zanter der Reform vum Staatsrot vun 2017 soll d‘Zesummesetzung vun der héijer Kierperschaft – zum Deel – déi vun der Chamber erëmspigelen.

Invité vun der Redaktioun: Christophe Schiltz

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.