E Mëttwoch de Moie war den ADR-Deputéierten eisen Invité vun der Redaktioun.

Et wier net seng Schold, datt d’Asti, d’Associatioun fir immigréiert Aarbechter, "vill Leit hei am Land" géing nerven, sou de Fred Keup de Mëttwoch de Moien hei op RTL. Den ADR-Deputéierte sot, jiddereen hätt d’Recht, eng Plainte ze maachen, mä hie géing net acceptéieren, datt d'Asti géing probéieren, e Lien ze maachen tëscht him an Haasscommentairë géint d’Asti-Presidentin. "Als wier ech iergendwéi de Schëllegen, datt d'Leit genervt si vun hinnen an duerno och nach den Opruff ze maachen un déi aner politesch Acteuren, fir do dogéint virzegoen a mech an e schlecht Liicht ze réckelen."

Wat hie selwer geschriwwen huet, wier a sengen Aen net a Fro gestallt. De Fred Keup huet widderholl, hie kéint d'Aussoe vun der Asti net esou stoe loossen. D'Asti-Presidentin Laura Zuccoli hat an enger Carte Blanche ënnert anerem gesot, datt laut Etüde besonnesch kapverdianesch Jongen an der Schoul nach ëmmer massiv a Filièren orientéiert ginn, an deene si keng oder ganz wéineg Qualifikatiounen erreechen. "Ech fannen dat net an der Rei, ech war laang genuch an der Schoul an ech hunn ni, ni, ni esou eppes materlieft an ech hunn net ganz gär, wann dann esou Saachen um Radio behaapt ginn", sou de Fred Keup. Dorop ugeschwat, datt souguer, wann et just eenzel Fäll vun Diskriminatioun ginn, een awer misst dogéint handelen, sot den ADR-Deputéierten, et géing Gesetzer ginn, déi dat sollen ënnerbannen.

Op d'Fro, ob hien als Politiker net misst d'Leit opruffen, e bëssen Anstand ze weisen, wa se sech op de soziale Reseauen ausdrécken, wollt den ADR-Deputéierten net mat "Jo" oder "Nee" äntweren. Senger Meenung no wier jidderee fräi, seng Meenung ze soen a wann eppes net an der Rei wier, da géing et Gesetzer ginn, déi dat ënnerbannen. Fir all eenzele wier et awer schwéier, all Commentaire juristesch ze bewäerten. Dem Fred Keup no géing et bei der Meenungsfräiheet awer effektiv eng Limitt ginn an et soll een anstänneg mateneen diskutéieren. Hie selwer hat eng Plainte gemaach, nodeems hie sech duerch e Lidd beleidegt gefillt hat. De Kënschtler gouf awer net verurteelt.

Invité vun der Redaktioun: Fred Keup

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.