En Dënschdeg de Moie war de Chef vum Pôle médical Psychiatrie an den Hôpitaux Robert Schuman eisen Invité vun der Redaktioun.

D’Psychiater sinn net averstane mat de parallelle Garden am CHL an um Kierchbierg. Vun haut un hu béid Spideeler daagsiwwer gläichzäiteg d’Urgencen op, bis 2024 soll dat ronderëm d’Auer de Fall sinn. Et hätt ee gesot "net mat eis", sot en Dënschdeg de Moien hei op der Antenn den Direkter vun der Psychiatrie um Kierchbierg den Dr Jean-Marc Cloos. Hie war Invité vun der Redaktioun.

Bei der Psychiatrie géing et fir d'Continuité des soins daagsiwwer duergoen, datt een Dokter Garde huet. Mat de parallelle Gardë missten dann awer zwee Psychiateren hir Praxis zoumaachen an hätten allebéid keng Zäit méi fir d'Patienten, déi ee Rendez-vous huelen. Eng Consultatioun géing nämlech, anescht wéi bei anere Spezialisten, eng hallef bis eng Stonn daueren an et kéint een de Patienten net spontan ofsoen, wann een da géing an d'Urgence geruff ginn. Dat heescht, wärend der Garde wär d'Praxis dann 8 Stonnen zou, plus nach eemol eventuell 4 Stonnen den aneren Dag, wann een an der Nuecht géing wakereg gemaach ginn, well een da jo Schlof misst nohuelen. Den Ament hätt een e Verloscht vun 12 Stonne Consultatioune pro Garde, an déi misst een da jo fir d'éischt mol nees erakréien. Dat wär onlogesch, well net sou vill Leit wéilte bei de Psychiater goen, ma d'Doktere selwer 12 Stonne pro Garde géinge verléieren.

Si parallel Garden iwwerhaapt néideg?
Nuets hätt een am Schnëtt 2-3 Urgencen. Eng um 22h00, eng um 24h00 an eng um 02h00. Dofir géing et och eigentlech duergoen, wa just een Dokter d'Garde hätt, vläicht souguer zwee, jee nodeem wéi een d'Regiounen am Land géing opdeelen. Och an der Kanner- a Jugendpsychiatrie hätten d'Dokteren am CHL an am Hôpital Kirchberg Garde. An do géing et och duergoen, wann nuets, net daagsiwwer, ee Psychiater fir déi zwee Services nationaux zoustänneg wier.

Reform vun den Urgencen net genuch „ausgeduecht“
An der ganzer Reform vun den Urgencë wier vill un "d'Urgencë" geduecht ginn, awer net vill un alles, wat no der eigentlecher Urgence hannendru kënnt. Et hätt een an de Servicer ze mann Infirmieren, fir eng „prise en charge sécurisante“ ze maachen. Wann een iwwer d'Urgencë schwéier gestéiert Patiente géing eranhuelen, déi delirant oder aggressiv wieren, da bräicht een och op den Unitéite méi Personal an dat géing feelen. Et wier net dru geduecht ginn, wat dat fir ee Rateschwanz géing mat sech bréngen, wann een d'Urgencen op den zwee Sitten um Kierchbierg an op der Areler Strooss géing opmaachen.

Et feel un Attraktivitéit: De Beruff vum Psychiater gëtt ëmmer manner attraktiv
Nieft de Suen an der therapeutescher Zäit, déi ee géing duerch d'Gardë verléieren, misst een och bedenken, dass et fir den Job net attraktiv ass, wann ee vill Weekender an Nuechten an der Klinik misst verbréngen. Gardë si bei de meeschte Medezinner net bezuelt. Obwuel den Europäesche Geriichtshaff schonn e puer Mol jugéiert hätt, dass Bereetschaftsdéngscht Aarbechtszäit ass, géing een 0 Euro dofir kréien, erkläert den Dr Jean-Marc Cloos. Dat heescht, et géing een am Spidol schlofen, ma wann een net géing geruff ginn, dann hätt ee fir näischt do geschlof. Et géing also net just ëm dat Finanziellt goen, mä natierlech géing dat Finanziellt matspillen, wann ee sech als Dokter freet, ob een iwwerhaapt wéilt am Spidol schaffen.

Beispill Jugendpsychiateren an den HRS: se wären zu 3 a géingen zesummen am Ganzen 10 Garden, 240 Stonnen de Mount maachen – fir näischt. Ausser wa se géinge geruff ginn, da géingen se natierlech verdéngen, sou den Invité. Wann een also engem jonke potenzielle 4. Jugendpsychiater dat géing soen, da géing deen d'Rechnung maachen, 30 duerch 4, 8 Gardë gratis am Mount, da géing dee léiwer am ambulatoirë Beräich oder am Ausland bleiwen, wou een den Ament besser Konditiounen hätt.

Fir de Beruff vum Psychiater, ma och vun anere Medezinner attraktiv ze halen, kéim een deemno net derlaanscht, de Bereetschaftsdéngscht  z'indemniséieren.

Léisungen: Psychiatrie-Ausbildung a Filière psychiatrique
Aktuell ginn et hei am Land eng 100 Psychiateren. Am Verglach mam Ausland missten et der awer gutt 150 sinn. Et géing den Ament och a kengem Spidol méi Assistenten an der Psychiatrie ginn. Dofir hätt een elo d'Initiative lancéiert, fir eng Psychiatrie-Ausbildung zu Lëtzebuerg virunzedreiwen, dass een déi zukünfteg Dokteren hei am Land géing ausbilden.

Donieft haten d'Psychiateren eng filière psychiatrique fir d'Urgencen proposéiert. Dat wären eng Infirmière psychiatrique, e Psycholog an e Psychiater. Dat wär daagsiwwer an och nuets eng interessant Iddi, well da kéint een all d'Problemer en charge huelen. Aktuell wären nämlech just een Drëttel bis maximum d'Hallschent vun de Patienten, déi an d'Urgence kommen, wierklech eng urgence psychiatrique. Mat esou enger Ekipp kéint een de Patient komplett encadréieren.

Iwwerlaaschtung an der Kanner- a Jugendpsychiatrie
Wärend der Pandemie hätte sech d'Waardezäiten bei de Psychiateren, a virun allem bei de Jugendpsychiateren däitlech verlängert, duerch eng méi héich Demande. De stationäre Service wier souwisou ëmmer op 100 Prozent gewiescht, dat wier och net besser ginn. Ma an der Dagesklinik, do hätt ee ganz laang Waardezäiten. Do géing een no Léisunge sichen, fir d'Leit scho virdrun ze gesinn. Et bräicht een eng psychiatresch Polyklinik, besonnesch fir Kanner a Jugendlecher, fir komplex Fäll en charge ze huelen.

Et hätt een an der Covid-Zäit méi Iessstéierungen, Angscht an Depressiounen, virun allem bei Jugendleche gesinn. Et géing een der Situatioun den Ament wierklech net méi Meeschter ginn. Bei den Negociatioune mat der CNS hätt een net dat Personal kritt, wat ee gefrot hätt. En Donneschden huet d'Associatioun vun de Psychiatere Rendez-vous bei der Santésministesch Lenert, fir iwwert hir Doleancen ze schwätzen.

Invité vun der Redaktioun: Dr Jean-Marc Cloos

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.