En Dënschdeg de Moie war de Generalsekretär vun der ALJP eisen Invité vun der Redaktioun.

Invité Roger Infalt / Reportage Pit Everling

Et wier e wichtegt Gesetz, fir de Mediepluralismus ze garantéieren a Licenciementer am grousse Stil ze evitéieren. De Gesetzprojet fir d'Reform vun der Pressehëllef läit fäerdeg um Dësch, ma d'Journalistenassociatioun ALJP ass mat dësem net zefridden.

Konkret kritiséiert d'ALJP, datt de geplangte Forfait vu 55.000 Euro pro Journalist op 30.000 Euro reduzéiert gouf. Firwat, dat wéisst een net. Dës Sue géingen net direkt un de Journalist goen, mä u säi Medienhaus. Och d'Definitioun vun engem Journalist misst am Text méi präzis formuléiert ginn.

Op alle Fall géing een elo riskéieren, e schlecht Gesetz fir d'Zukunft ze kréien, sou de Roger Infalt. D'ALJP versteet et iwwerhaapt net, datt déi parlamentaresch Mediekommissioun keen Dialog mat der Journalistenassociatioun wëll.

Datt véier Editeuren an dëser Saach der ALJP net de Réck stäipen, kéint hie novollzéien, well dës op déi Pressehëllef géinge waarden, sou de Roger Infalt. 

D'ALJP bleift iwwerdeems bei hirer Fuerderung zu engem besseren Informatiounszougang. Fréier hätt een deejéinegen ugeruff, vun deem ee gären eng Ausso gehat hätt. Zënter der Circulaire Bettel hätt een et mat ëmmer méi Pressespriecher ze dinn. Den Accès zur Informatioun wier schwiereg an opwänneg an dacks kréich een net déi Äntwert, déi ee wéilt a bräicht.

Invité vun der Redaktioun Roger Infalt

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.