E Freideg de Moie war d'Ëmweltministesch eis Invitée vun der Redaktioun.

Eng Lëscht mat Betriber, déi net konform mam Offallgesetz sinn, dorënner d’Dieschbourgsmillen, ass elo awer opgedaucht. Trotzdeem bleift déi gréng Ëmweltministesch Carole Dieschbourg dobäi, näischt dovunner gewosst ze hunn. Op d’Ausso, datt d’Lëscht awer dem fréieren Direkter vu Valorlux Recht gëtt, huet d’Ministesch gekontert a gefrot, firwat hien dann net den “übleche Wee” geholl hätt an d’Dieschbourgsmillen d’selwecht behandelt hätt ewéi déi aner? Si sot, 2014 wier et e Kontakt ginn, si wéisst dat elo, mä d’Dieschbourgsmillen koum deemools net op eng Lëscht vu net-konforme Betriber.

D’Lëscht vun 2021, déi wier och un d’Ëmweltverwaltung gaangen, an zwar net esou ewéi et soll, huet d’Ministesch weider erkläert. Donieft wier d’Lëscht an enger E-Mail vu Valorlux gewiescht an där stoung, datt et déi selwecht Lëscht wier, déi d’Verwaltung schonn hätt a wou d’Dieschbourgsmillen net drop steet.

Bei enger Entrevue mat de Responsabele vu Valorlux wéilt een haut "Inkoherenzen" aus dem Wee raumen. Et wéilt een awer och erëm eng Vertrauensbasis schafen, well d’Relatioun tëscht der Ëmweltverwaltung an der Valorlux hätt eng „Téitsch“ kritt. D’Carole Dieschbourg sot awer och an der Ëmweltverwaltung géing eng „Feelerkorrektur“ gemaach ginn. Dat well d’Verwaltung no enger éischter Nofro d’Lëscht net fonnt hat. Si huet och zouginn, datt sech am „Nachhinein“ erausstellt, datt d’Dieschbourgsmillen ni konform war mam Offallgesetz. Allerdéngs wier dat bei wäitem net den eenzege Betrib: elo sinn et der nach 36.

Zoustänneg fir d’Kontroll vun der Konformitéit wier net de Ministère, mä d’Ëmweltverwaltung, déi mat just 2,5 Offizéier vun der Police judiciaire ënnerbesat wier. Aktuell géingen awer 2 weider Poste rekrutéiert ginn.

Invité vun der Redaktioun: Carole Dieschbourg

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.