E Méindeg de Moie war de President vum Naturpark Uewersauer eisen Invité vun der Redaktioun.

Et war bei eis laang net sou schlëmm wéi an de 90er Joren. Dat sot eis de Charles Pauly, de President vum Naturpark Uewersauer, e Méindeg de Moien als eisen Invité vun der Redaktioun.

D’Réckhal-Capacitéite vum Stauséi hätte geklappt, mä et hätt wuel am Anzuchsgebitt vum Stau och manner gereent wéi op anere Plazen. Allerdéngs hätten zum Beispill och op der Uewersauer Campingen ënner Waasser gestanen.

Wat déi aktuell touristesch Saison ugeet, wier et méi roueg wéi zejoert, wat sécher dem Wieder geschëlt wier, sou de Charles Pauly. De Reservatiounssystem fir Plagë géif iwwerdeems gutt funktionéieren. Gutt 40.000 där Reservatioune goufen et bis ewell dëst Joer.

Natierlech wier et och sou, datt verschidde Leit, déi net reservéiert hunn, géife wëll campen a grillen. Um Stauséi géingen et Reegele ginn, an déi solle respektéiert ginn. Um Stau ass jo zënter Kuerzem e Ranger ënnerwee, dee kuckt, ob alles an der Rei ass.

Et wier awer och scho virkomm, datt Leit, déi sech net un d’Reegele gehalen hunn, sech mam Ranger an d’Hoer kruten an hie mam Hals geholl hunn, sou de Charles Pauly.

Invité vun der Redaktioun: Charles Pauly

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.