En Donneschdeg de Moie war d'Bâtonniere eis Invitée vun der Redaktioun.

De Barreau wëll mat der Steierverwaltung zesumme kucken, wéi a ganz limitéierte Fäll Informatiounen iwwert Cliente solle gedeelt ginn. Dat sot d’Bâtonnière Valérie Dupong en Donneschdeg de Moien hei op RTL, am Zesummenhang mat der Serie Urteeler vun der Cour administrative. Dës hat am Juli festgehalen, datt Affekote sech net ëmmer kënnen hannert de secret professionnel verstoppen.

D’Valérie Dupong gesäit déi Urteeler awer geloossen, well et wéi gesot d’Steierverwaltung eng ganz Rei Konditioune muss erfëllen, fir Informatioune vu Clienten ze froen. Zum Beispill muss et e kloren Unhaltspunkt ginn an et muss sech ëm e Lëtzebuerger Steierzueler handelen. Et géing sech och op Steierberodung limitéieren. „Schlussendlech bleift ganz wéineg“, sou d’Valérie Dupong.

D’Bâtonnière huet och drop higewisen, datt een „an enger anerer Zäit“ wier haut. Et wieren vill nei Gesetzer déi lescht Jore komm, zum Beispill an der Lutte géint d’Wäisswäsche vu Suen. Esou Gesellschaftsstrukture wéi d’Panama Papers wier haut an hiren Aen net méi méiglech. Doriwwer eraus huet si betount, datt aggressiv Steieroptimiséierung legal wier an den Affekot dat net misst mellen. International Strukturen wieren net ëmmer just wéinst de Steieren, mä och zum Beispill fir Ierfschaften ze reegelen.

Wat d'Affär ëm den Affekot André Lutgen betrëfft, dee Beleidegunge géigeniwwer engem Untersuchungsriichter virgeheit kritt, huet d'Bâtonnière betount, datt ënnert den Affekoten eng gewëssen Nervositéit ze spiere wär. Virun allem, wann ee géif gesinn, wat an eisen Nopeschlänner passéiert. Zum Beispill a Frankräich, wou Affekote mat hire Clienten zesummen ugeklot ginn, fir datt de Secret fält, oder an der Belsch wou rezent Gespréicher vun Affekoten an hire Clienten am Prisong enregistréiert goufen. Dat alles géif zu enger genereller Onsécherheet féieren.

Anere Sujet waren dann nach déi rezent Iwwerschwemmungen, no deenen och de Barreau Hëllef ubidde wollt. Eng 60 Affekoten hu sech doropshinn gemellt, fir gratis Consultatioune fir d'Affer ze ginn. Déi ganz Lëscht fënnt een ënnert www.barreau.lu.

Invité vun der Redaktioun: Valérie Dupong

Nott vun der Redaktioun: D’Ausso iwwert d'Legalitéit vun aggressiver Steieroptimiséierung kann ee relativéieren: de Finanzministère verweist op eng Rei Reegelen, déi aggressiv Steieroptimiséierung awer bekämpfen.

Op Nofro hin betount de Finanzministère effektiv, dass et zu Lëtzebuerg e Gesetz gëtt, dat et den Contribuabelen imposéiert, exzessiv Steiermodeller ze mellen, déi als aggressiv ugesi ginn. Dat Gesetz gëtt et zanter Mäerz 2020. Domat gouf eng europäesch Direktiv ëmgesat.

"Och wann d'Affekoten duerch hiert Beruffsgeheimnis vun dëser Flicht, dat ze mellen, dispenséiert sinn, sou hu si dach d'Obligatioun, all aneren Intermediairen oder soss de concernéierten Contribuabele selwer matzedeelen, dass si der Steierverwaltung déi steierlech aggressiv Gestaltung melle mussen", sou d'Äntwert aus dem Finanzministère.

D'Steierverwaltung beäntwert op hirem Site eng ganz Rei froen zu dësem Thema.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.