En Dënschdeg de Moie war den Direkter vun der Fedil eisen Invité vun der Redaktioun.

Den éischten Deel vum neie Rapport vum Weltklimarot ass eng gutt Basis fir politesch Decisiounen. Dat sot de Vertrieder vun der Industrie, de René Winkin en Dënschdeg de Moien hei op RTL. Den Direkter vun der Fedil sot et wier net un hinne wëssenschaftlech Erkenntnisser ze hannerfroen.

Gefuerdert wieren awer elo d’Politiker, fir de richtege Kader an d’Mesuren op d’Been ze stellen, fir d’Klimaziler z’erreechen. Dem René Winkin no dierf een net just bei den Ziler hänke bleiwen a bei plakegen Zuelen-Ziler. Eng kloer Trajectoire fir de Secteur vum Emissiounshandel géing zum Beispill garantéieren, datt et net méi Quote ginn ewéi an där Trajectoiren. Allerdéngs huet hie gewarnt, datt et fir e Bauer oder fir eng eenzel Industrie schwiereg wier ze wëssen, wat et genee fir ee bedeit, wann ee muss op d’Zil kommen.

De René Winkin huet e puer konkret Mesuren genannt, wéi och hei am Land direkt kéint gehandelt ginn, fir d’Emissiounen ze reduzéieren. Zum Beispill kéint senger Meenung no d’CO2-Steier en duebelen „Incentive“ hunn, wa se progressiv wier. Donieft huet hie fir eng „extrem“ Elektrifizéierung an der Industrie an op de Chantiere plädéiert, sou wéi fir e bessere Reseau vu Bauschutt-Deponien. „Ouni politescht Dazutun“ kéinten dës konkret Mesuren awer net ëmgesat ginn.

Bei den Efforte géint d’Äerderwiermung bräicht et awer och kloer eng international Aktioun, esou nach de René Winkin. Europa hätt seng Responsabilitéiten, mä géing dat eleng net hikréien.

Invité vun der Redaktioun: René Winkin

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.