E Freideg de Moie war den Direkter vum Fonds du Kirchberg eisen Invité vun der Redaktioun.

Um Kierchbierg gëtt am Moment méi geschafft ewéi gewunnt. 4.000 Leit liewen um Plateau a ronn 42.000 Persounen hunn hei hir Aarbecht.

Ma genee do wëll een e besseren Equiliber, seet den Direkter vum Fonds du Kirchberg. De Marc Widong war um Freideg de Moien eisen Invité vun der Redaktioun.

Um Kierchbierg soll massiv Logement geschafe ginn. An 20 Joer solle 7 mol sou vill Leit hei wunnen ewéi haut. Een neie Quartier entsteet zum Beispill um Kuebebierg mat Plaz fir 10.000 Leit. De Gros gëtt via d'Emphytéose verkaaft.  Ënner anerem gëtt mat der SNHBM zesumme geschafft.

An den nei Quartiere soll eng gewëss Mixitéit entstoen, mat Logement a Commercen, fir kuerz Weeër méiglech ze maachen.

Op där aner Säit wäerten awer weider Aarbechtsplazen um Kierchbierg derbäi kommen. Zueleméisseg soll et bis 2040 do op 67.000 erop goen.

Wat d'Mobilitéitskonzept ugeet, soll manner op den Auto gesat ginn a méi méi op den ëffentlechen Transport. Bis 2028 soll et zum Beispill eng weider Tram-Linn ginn, déi iwwert de Boulevard Konrad Adenauer bei d'Rout Bréck fiert.

Och de Reseau vun de Velospiste gëtt weider ausgebaut.

Wat déi grouss Projeten ugeet, do gi jo zum Beispill d'Foireshalen reamenagéiert. Hei gëtt an d'Héicht gebaut, fir datt um Site och Plaz fir Logement an aner Commercen entsteet.

Invité vun der Redaktioun: Marc Widong

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.