En Dënschdeg de Moie war den Direkter vun der Santé eisen Invité vun der Redaktioun.

Et däerf een net naiv sinn, et mécht ee sech natierlech Gedanken an et ass dervun auszegoen, dass mer am Hierscht, genee wéi d’lescht Joer, och eng Well kréien. D’Delta-Variant spillt do natierlech mat. Sou sot et den Dr Jean-Claude Schmit um Dënschdeg de Moien als eisen Invité vun der Redaktioun.

Den Direkter vun der Santé huet insistéiert, dass e kollektiven Impfschutz essentiell wier, fir d’Situatioun net derapéieren ze loossen.

Beim Taux vun de Geimpfte läit ee bei den Erwuessenen (18+) bei 73,2% vun den éischten Dosissen. Kuckt een déi komplett vaccinéiert Leit, steet ee mat 70,6% méi héich wéi déi europäesch Moyenne. Nach wier awer Sputt no uewen, seet den Dr Schmit. Dofir wéilt een d’Disponibilitéit vun der Impfung sou einfach wéi méiglech maachen. D’Beispill vum Impf-Bus géif weisen, dass d’Impfung soll bei d’Leit kommen. Dernieft géife Fake-News op de soziale Medien iwwert de Vaccin zirkuléieren, wougéint ee wéilt virgoen, sou de Santésdirekter.

D'Iwwerleeungen a puncto drëtt Impfung oder Opfrëschungsdosis géifen iwwregens lafen. Et wéilt ee sech d’Donnéeë vun Israel, déi am Laf vun der Woch solle publizéiert ginn, och ukucken.

20 bis 25% vun den Infektiounen, déi an der Lescht festgestallt gi sinn, waren iwwregens fäerdeg geimpft. Bei der Santé kuckt een den Ament, u wat dat louch. Et wéilt een d’Donnéeë regroupéieren, fir ze kucken, ob e Schema z'erkenne wier.

Fir den Ament ass iwwregens nach net gekläert, ob et fir d'Schoul-Rentrée weider eng Maskeflicht gëtt oder net. Eng 2. Reunioun mam Educatiounsministère wier do an den nächsten Deeg.

Invité vun der Redaktioun: Dr Jean-Claude Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.