En Donneschdeg de Moie war de President vun der Associatioun vun de Giischtercher AAP eisen Invité vun der Redaktioun.

Invité Samir Djennas / Resumé Claudia Kollwelter

D’Situatioun ass net onbedéngt méi ugespaant. D’Restriktioune fir d'Detenue waren zwar e bësse méi grouss, mä dat wier eben zum Covid-Schutz vu jidderengem gewiescht, esou sot et de President vun der Associatioun vun de Giischtercher als eisen Invité vun der Redaktioun.

De Samir Djennas kann dowéinst och d'Kritik vun der ASBL „Eran, eraus an elo?“, déi sech fir d'Rechter vu Prisonéier asetzt, net novollzéien. Si hate kritiséiert, dass d'Visitten drastesch gekierzt goufen, dat hätt ee groussen Impakt op déi mental Gesondheet vun de Prisonéier. De President vun der AAP sot dozou, dass all Mënsch fir eng gewëssen Zäit ageschränkt gouf, et misst ee just un d'Altersheemer denken. Donieft hätt een och alles gemaach, fir sou gutt wéi méiglech Visitten oprecht z'erhalen. Zum Beispill och iwwer Visio-Konferenz a Skype.

Donieft sot de Samir Djennas, dass et Nohuelbedarf bei der Ausbildung vun de Giischtercher gëtt. Aktuell géife si behandelt gi wéi eng administrativ Karriär a sou géif och d’Ausbildung lafen. Et géife wéineg Workshoppen oder Praxis um Terrain ginn. Dobäi misst awer onbedéngt méi Wäert drop geluecht ginn, fir méi praktesch forméiert ze ginn, beispillsweis wat ee bei engem Feier mécht, wéi ee sech bei Revolte verhält, Self-Defense a sou weider.

E Personalmangel wier do, seet de Samir Djennas. Aktuell wier een zu eppes iwwer 410 Beamten, vun deenen iwwregens dräi Véierel geimpft sinn. En Vue vun der Ouverture vum Untersuchungsprisong um Uerschterhaff misst een der awer nach iwwer 200 rekrutéieren.

D'Iddi vun der Policegewerkschaft, dass Giischtercher an Zukunft sollen de Gefaangenentransport iwwerhuelen, déi wier prinzipiell gutt, mä och hei géing sech d'Fro vum Rekrutement stellen. Si hätte genee sou ee Personalmangel wéi d'Police. Donieft misst een dann och déi néideg Ausbildung dofir kréien, een entspriechende Fuerpark an et géing sech dann d'Fro stellen, ob een d'Recht géing kréien, fir ausserhalb vum Prisong eng Waff ze droen a mat bloer Luucht ze fueren.

Vu momentan 551 Detenuen zu Schraasseg sinn iwwregens just 26 Fraen an dovunner just 12 Stéck, déi verurteelt sinn, also och fir eng Aarbecht a Fro kommen. Dat géing et och schwéier maachen, fir fir Frae méi divers Atelieren unzebidden oder extra Aarbechtsplazen ze schafen, well et keng grouss Demande gëtt. Mat der Ouverture vum Uerschterhaff soll sech dat awer änneren, sou eisen Invité.

Invité vun der Redaktioun: Samir Djennas

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.