E Méindeg de Moie war d'Generalsekretärin vun der Camprilux eis Invitée vun der Redaktioun.

Déi eng waren no e puer Deeg botzen nees aktiv, anerer si souguer haut nach zou, dat sot d’Linda Gedink e Méindeg de Moien als eis Invitée vun der Redaktioun. D’Generalsekretärin vun der Camprilux, der nationaler Associatioun vun de Campingen, mat 55 Memberen an engen 8.000 Stellplazen. Am Ganze ginn et hei am Land 75 Campinge mat engen 10.100 Stellplazen.

Praktesch all déi Campingen, déi bei engem Floss leien, waren dann och vum Héichwaasser am Juli betraff. De Schued wier schwéier a Chifferen ze faassen, do misst een d'Auswäertung vun den Expertisen ofwaarden. D'Camprilux huet sech selwer e Fréiwarnsystem en place gesat, mat deem d'Campingen iwwer een SMS-System Bescheed gesot kréien, wann d'Peegele klammen. Dat géing fir d'Sauer, also d'Regioun vum Stauséi ganz gutt fonctionéieren. Ma zum Beispill fir d'Our wär nach keen esou ee System en place, doru géing ee schaffen. An da misst een och kucken, fir Infoen aus der Belsch ze kréien, well d'Sauer an d'Our allebéid hiren Ursprong do hunn, sou d'Invitée.

D’Wieder 2021 ass jo och net immens. Et géif een awer mierken, dass d'Leit Loscht hätten ze kommen, awer vläicht manner laang bleiwe wéi soss, well ze fiicht Wieder engem dann awer d'Loscht kéint verdreiwen. De Covid huet natierlech och een Impakt. D'Leit géife vill méi reservéieren am Virfeld. Spontan kéime just nach déi wéinegst. Och den Trend vum "Glamping", also dem glamouréise Camping a sougenannte "Pods", Haisercher oder Safari-Zelter géing hei am Land ëmmer méi populär ginn. Donieft géif awer och opfalen, dass ëmmer méi Lëtzebuerger d’Vakanz doheem um Camping nees géife fir sech entdecken. Eng 10-11.000 staatlech Iwwernuechtungsbongen, sou schätzt een, wiere bis ewell op de Campingen ageléist ginn, sou d’Linda Gedink.

Invité vun der Redaktioun (30. August): Linda Gedink

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.