En Dënschdeg de Moie war den Deputéierte vun de Piraten eisen Invité vun der Redaktioun.

Et stëmmt quasi guer näischt un der Propos vun enger Coronasteier. Wa mer en Debat wëlle feieren iwwer Steiergerechtegkeet, da misst grad eng LSAP mat aneren Iddie komme wéi enger Coronasteier. Dat sot den Deputéierte vun de Pirate Sven Clement en Dënschdeg de Moien als eisen Invité vun der Redaktioun. Den LSAP-Minister a Vizepremier Dan Kersch hat bei eis op der Antenn erkläert, wéi sou eng Steier kéint berechent ginn.

De Sven Clement huet ausgerechent, wat do kéint u Suen zesummekommen a kënnt op maximal 50 Milliounen Euro, déi sou eng Steier géif erabréngen, dat, fir e Coronalach vu 5 bis 6 Milliarden Euro ze stoppen.

De Sven Clement reprochéiert dem Dan Kersch Populismus a reng Waltaktik. Parallel géif d’Regierung awer op d’Geriicht goen, fir 250 Milliounen Euro Steiere vun Amazon net ze kréien. D’Piraten hu grouss Zweiwel, datt ee retroaktiv Steiere kéint aféieren. Dat wier verfassungstechnesch sécherlech ganz komplizéiert. Steierlächer missten zougemaach, d’Real-Besteierung misst méi ugepasst a gerecht ginn. Fir de Sven Clement kéint et net sinn, datt et weider Betriber gëtt, déi vill Gewënn maachen a just 1% Steiere bezuelen.

D'Geheimdéngschter hunn am Fall Afghanistan versot

Wat den Afghanistan ugeet, vertrëtt de Pirat iwwerdeems weider d’Positioun, datt do an de leschte Méint "ganz vill verpennt gouf". Et hätt een dat misse komme gesinn a sech preparéieren. Et wiere kloer Indicen do gewiescht zanter dem Fréijoer op wat d’Situatioun um Hindukusch erausleeft. D’Geheimdéngschter hätte versot. De Grand-Duché hätt beispillsweis derfir suerge kënnen, datt déi Leit, déi mer elo eraus wollte kréien, scho vill éischter aus Afghanistan eraus hätte kënne kommen, wéi d’Situatioun nach eng aner war.

Regierung refuséiert, hir Indicateure kloer opzeweisen

An der Chamber muss och geschwënn en neit Covid-Gesetz gestëmmt ginn. Dat aktuellt leeft de 14. September aus. Et misst een ewechkomme vun der Inzidenz, mengt de Sven Clement. D’Regierung géif awer zanter 18 Méint refuséieren, hir Indicateuren, wéini wéi eng Reegele gëllen, kloer opzeweisen. E Mëttwoch ass Regierungsrot a Briefing, wou een dann dierft gewuer ginn, wéi et mat de Coronamesuren hei am Land weidergeet.

Invité vun der Redaktioun: Sven Clement

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.