E Mëttwoch de Moie war de Fuerscher a Mikrobiolog a Member vun der Covid-19-Taskforce eisen Invité vun der Redaktioun.

Mir mussen dervun ausgoen, datt mer am Hierscht/Wanter nees eng Hausse vun Neiinfektioune gesinn. Mä wéi ausgepräägt dës nei Well wäert sinn, dat géing vu verschiddene Variabelen ofhänken. Zum Beispill, wéi wäit ee mam Impfen ass, wéi eng Varianten am Ëmlaf sinn a wéi eng Mesuren en place sinn. Dat sot de Professer Paul Wilmes. De Fuerscher a Member vun der Covid-19-Taskforce war e Mëttwoch de Moien eisen Invité vun der Redaktioun.

D'Impfunge wäre ganz wichteg, fir d’Leit ze schützen. Geimpft iwwerdréit een de Virus och manner. Datt elo an anere Länner wéi an England oder Dänemark Restriktiounen opgehuewe ginn, kéint een net als Beispill huelen, fir och hei Mesuren ze lackeren. Do wär mat 87-89% vun den Erwuessenen den Impftaux méi héich wéi hei am Land, sou den Invité. Lëtzebuerg läit bei 74%. Hei ginn et nach méi ongeimpfte Leit. Restriktiounen ophiewe géif also kee Sënn maachen. Och géif de Reproduktiounstaux de Moment wäit iwwer 1 leien.

Ouni d’Delta-Variant wär d’Situatioun haut eng aner, confirméiert de Mikrobiolog. De Vaccin schützt manner gutt géint Delta a bei Net-Geimpfte féiert d’Variant zu méi Hospitalisatiounen. Gewosst wär och, datt d’Immunitéit vun de Geimpfte lues ofhëlt. De Coronavirus wär scho speziell, sou eisen Invité, well een och ouni Symptomer de Virus kann iwwerdroen. Eng Herdenimmunitéit wär warscheinlech schwéier iwwer d’Impfen z’erreechen. Theoretesch kéint de Virus och an eng positiv Richtung mutéieren, dat wär ze hoffen, awer ongewëss.

D’Schoulrentrée ass jo de Moment e Sujet. Op d’Loftfilter-Apparater ugeschwat, sot de Professer Wilmes, datt et net wierklech vill empiresch Donnéeën iwwer d'Loftfiltere gëtt an den Asaz an de Klassesäll. Ob se wierklech hëllefen, wär net kloer. Sécher wär awer, datt Lëften effikass ass, sou de Wëssenschaftler. Den Entretien, Kaméidi an Hëtztentwécklung kommen nieft de Käschten nach bei déi Apparater derbäi.

De Large-Scale-Testing leeft Mëtt September aus. E war ganz effikass an huet wesentlech dozou bäigedroen, d'Corona-Wellen ze briechen an ze verhënneren, datt eis Spideeler iwwerfëllt waren. Dobäi bleift de Professer Paul Wilmes. D'Well am leschte Wanter/Hierscht konnt een net verhënneren, mä dat hätt ee souwisou net kënnen, sou den Invité.

An Zukunft misst warscheinlech manner op d’Infektiounszuele gekuckt ginn, mä nach méi op d'Hospitalisatiounen a wéi staark d’Intensivstatioune beluecht sinn, sou nach de Fuerscher a Member vun der Covid-19-Taskforce.

Invité vun der Redaktioun: Paul Wilmes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.