En Donneschdeg de Moie war den Energieminister eisen Invité vun der Redaktioun.

De Klimasystem kënnt geféierlech no un e Punkt, wou e kéint kippen. Dofir musse mer beim Klimaschutz Tempo maachen. An dat ass genee dat, wat mer als Regierung maachen. Dat sot en Donneschdeg de Moien de Claude Turmes. De gréngen Energieminister war eisen Invité vun der Redaktioun.

De leschte Rapport vum Weltklimarot géif seng Analys, déi en zanter Joren hätt, confirméieren, datt ee misst Eescht maache beim Klimaschutz. Seng Politik wär et, de Leit et sou einfach ze maache wéi méiglech fir ëmzeklammen. Zum Beispill beim Renovéieren. D’Prime House gi reforméiert. An Zukunft soll een och eng Primm kréien, wann ee just den Daach ersetzt oder just eng Fënster. D’Formulairen an d’Ausfëlle soll och vereinfacht ginn. De Klimaschutz soll méi einfach a méi séier ginn, seet de Claude Turmes, an zur Normalitéit ginn.

Wat d’Elektromobilitéit ugeet, hätt Lëtzebuerg elo schonn den zweetbeschte Reseau mat de Bornen, hannert den Hollänner, an et wier nach villes ugeduecht. 88 Super-Chargeren komme geschwënn derbäi. 40 Milliounen Euro ginn investéiert fir Bornen op der Aarbechtsplaz an am Logistiksecteur an och doheem gëtt een ënnerstëtzt. D’Infrastruktur op den Tankstellen op den Autobunnen an am ganze Land misst an den nächste Joren ëmgestallt ginn. Dat misst elo geplangt ginn, fir a 5-6-7 Joer prett ze sinn.

Shell hätt zum Beispill annoncéiert, a Groussbritannien 50.000 Elektrobornen opzeriichten. De Pëtrolskonzern hätt verstanen, datt d’Zukunft vum Auto elektresch ass, fënnt de grénge Minister.

De Waasserstoff wär net ideal fir Autoen, mä fir grouss Gefierer, huet de Politiker op en Neits erkläert. Op Beetebuerg soll eng Waasserstoff-Tankstell kommen haaptsächlech fir Camionen an de Logistik-Secteur.

Wat d’Stroumproduktioun ugeet, setzt Lëtzebuerg ënnert anerem op d’Wandenergie. An investéiert och am Ausland. Lëtzebuerg wëll sech jo un enger dänescher Energie-Insel mat engem Offshore-Wandpark bedeelegen. D’Belsch plangen och sou eng kënstlech Insel, sot de Claude Turmes en Donneschdeg de Moien. Och hei wëll de Grand-Duché matmaachen. Dat wäert en Deel si vun der zukünfteger Stroumpolitik, sou de Lëtzebuerger Energieminister. Dat fir d’Enn vun dësem Joerzéngt.

Invité vun der Redaktioun: Claude Turmes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.