E Freideg de Moie war d'Familljeministesch eis Invitée vun der Redaktioun.

An den nächsten zwou Woche wëll d'Familljeministesch Corinne Cahen nei Recommandatioune fir d'Alters- a Fleegeheemer presentéieren, déi den Ament nach mat der Santé zesummen ausgeschafft ginn. Et misst een den neie Gegebenheeten Rechnung droen, sou déi liberal Ministesch, déi e Freideg de Moien eis Invitée vun der Redaktioun war. Diskutéiert gëtt zum Beispill iwwert de Ëmgang mat Geimpften an Net-Geimpften a Quarantänsreegele fir nei Residenten.

Déi grouss Majoritéit vun den Awunner wiere geimpft an den Ament wier hir och just eng potentiell Infektioun an engem Haus bekannt. Et géif ee mierken, datt de Vaccin hëlleft. Den Ament schafft de Conseil supérieur des maladies infectieuses un engem Avis iwwert eng drëtt Impfdosis bei den eelere Leit. Der Ministesch no, misst ee besonnesch an deene Strukturen an deenen d'Residenten nëmme wéineg Antikierper hunn, iwwert eng drëtt Dosis schwätzen. Et misst een d'Leit sou gutt wéi méiglech schütze virun der nächster Well. D'PCR-Tester ginn an den nächste Méint an den Alters- a Fleegeheemer bäibehalen.

D'Kriticken un hire vergaangener Gestioun léisst d'Corinne Cahen weider net gëllen. Si wier mat de Chargés de direction a Kontakt gewiescht an et wier nach ëmmer richteg, datt een d'Haiser net all d'selwecht behandelen kéint.

Déi lescht Chifferen iwwert d‘Impfunge vun de Mataarbechter an den Alters- a Fleegeheemer hätt Si nach net, sou d’Corinne Cahen. Et géife sech haut nach ëmmer Leit spontan zum Beispill am Impfbus impfe loossen.
De Pourcentage u geimpftem Personal am Fleegesecteur ze definéieren, wier schwiereg, well e gréisseren Deel vum Personal eben och net zu Lëtzebuerg géif wunnen, dofir wier et schwéier eng präzis Statistik opzestellen. E géif awer iwwer 65% beim Personal am Land leien. De Patron huet jo hei am Land nach net déi juristesch Méiglechkeet fir nozefroen, ob ee geimpft ass oder net.

D’Regierung wëll et och weiderhi versichen, d’Leit fräiwëlleg zu enger Impfung ze bréngen. Dofir misst een awer weider Iwwerzeegungsaarbecht leeschten. Si perséinlech kéint op alle Fall net verstoen, datt ee sech net géif impfe loossen. Besonnesch dann, wann een an engem Gesondheetsberuff schafft. Et kéint een och net vu perséinlecher Fräiheet schwätzen, sech net impfen ze loossen. Et wier dach keng Fräiheet, wann ee wéi elo aschränkt wier. D'Impfe wier en Akt vu Solidaritéit, an et kéint een dem Impfstoff vertrauen, sou nach eis Invitée vun der Redaktioun.

Invité vun der Redaktioun: Corinne Cahen

Reaktioun vum Sven Clement a Claude Wiseler

D'Familljeministesch presentéiert an zwou Wochen nei Recommandatioune fir d'Gestioun vun der Corona-Kris an den Alters- a Fleegeheemer. De Gros vun den Awunner wier geimpft. Wéi vill Mataarbechter aus dem Secteur mëttlerweil geimpft sinn, kéint een net soen. De Piratendeputéierte Sven Clement stellt dat awer a Fro - wann een dat kéint am Enseignement erausfannen, misst dat och hei goen.

"Eis grouss Kritik beim Opbaue vun deenen Datebanken ass eben ëmmer, well et sou einfach ass. Ech sinn Informatiker, ech weess, datt dat keng Hexerei ass, wann een déi richteg Befeeler an de Computer agëtt, da ginn déi richteg Croisementer gemaach. Wann et fir d'Educatioun geet, an do huet de Claude Meisch jo elo zouginn, datt et geet, dann ass et just eng Fro, wéi eng Coden, wéi eng Employeure gi mer an de Fichier sichen, a wéi kräize mer déi mat eiser Impfdatebank. Mir wëssen, datt et déi Datebank gëtt. Mir hunn ëmmer gewarnt, datt do Croisementer méiglech wieren, de Claude Meisch huet bewisen, datt et déi Croisementer ginn, wann also elo d'Familljeministesch de Contraire behaapt, dann halen ech dat fir ganz onglafwierdeg."

Zwee Méint nodeems déi ganz Oppositioun d'Demissioun vun der Corinne Cahen gefrot huet, zweiwelt de Sven Clement drun, datt d'Familljeministesch Léieren aus dem Waringo-Rapport gezunn huet.

"Mir gesinn net wierklech, datt et hei weidergeet. Et gouf sech elo nees Wochen- a Méintlaang domat beschäftegt Recommandatiounen auszeschaffen ouni wierklech e verbindleche Kader ze schafen, et gëtt sech nach ëmmer drop behaapt, et wier alles richteg gemaach ginn, et gëtt esouguer gesot "Ech muss elo alles op Facebook posten, fir datt kee mer ka soen, ech hätt net mat de Leit geschwat", ma ech hu mer hire Facebook ugekuckt, do geet se an den Deeg knieden, mee se gesäit awer net sou aus, wéi wa se sech wierklech iwwert d'sanitär Konzepter vun den Haiser informéieren. Dat heescht wann dat hir Argumentatioun ass, ass se ganz schwaach."

Manner streng ass de Claude Wiseler - hie géing hoffen, datt d'Recommandatiounen elo kloer an um Terrain ëmsetzbar sinn. Fir de CSV-Deputéierte ass et iwwerdeems elo nach ze fréi fir ze beurteelen, ob ee méi streng Mesure fir d'Personal am Gesondheets- a Fleegesecteur bréicht, wéi zum Beispill eng Impfflicht. D'CSV wéilt d'éischt emol gesinn, wéi een Impakt d'Testflicht hat.

"Ech géing elo mol och gär d'Resultater gesi vun deem, wat dee leschte Gesetzestext bruecht huet. Et muss ee jo kucken, mir hunn do eng Rei Obligatiounen agefouert, och op Drock vun der CSV ass dat an d'Gesetz era komm, an ech géing elo an dësem Moment gär wëssen, wat war d'Resultat dovun, huet dat eppes bruecht, ass dee Schutz, dee mer domat bruecht hu genügend oder hu mer Zuelen an deenen Haiser, déi eis soen, dat geet net duer. Ech wëll mer réischt en Urteel an eng definitiv Decisioun maachen iwwert d'Necessitéit nach e Schrëtt ze maachen, wann ech weess, wat dëse Schrëtt bruecht huet."

De Claude Wiseler

Et misst een iwwerdeems kucken, ob déi aktuell Testflicht fir d'Personal duergeet, fir d'Awunner an de Strukturen ze schützen - hie géing gär d'Resultater vun där Mesure gesinn, iert e sech géing eng Meenung iwwert weider Schrëtt, wéi zum Beispill eng Impfflicht maachen, sou de Claude Wiseler.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.