E Mëttwoch de Moie war déi nei Vertriederin vun der EU-Kommissioun eis Invitée vun der Redaktioun.

Déi nei Vertriederin vun der EU-Kommissioun wëll net nëmme mat deene schwätzen, déi sech souwisou scho fir Europa interesséieren. "Mir mussen nolauschteren an all d'Leit vun der Gesellschaft erreechen", sou d'Anne Calteux de Mëttwoch de Moien hei op RTL. Speziell mat de Jonke wéilt een an d'Gespréich kommen, zum Beispill elo op engem Museksfestival.

Déi nei Raimlechkeete vun der Maison de l'Europe hei um Kierchbierg wiere sécherlech net ideal, fir un d'Leit erunzekommen, huet d'Anne Calteux awer zouginn. Ee vun de Grënn, fir aus der Alstad aus dem Gilly-Haus fortzegoen, wier de Loyer gewiescht. Dofir gëtt et de Moment och keen Informatiounszenter, bis d'"Jean-Monnet-2-Gebai" um Kierchbierg fäerdeg ass. Un enger Iwwergangsléisung géing awer geschafft ginn.

D'Anne Calteux war bis viru Kuerzem Generalcoordinatrice am Gesondheetsministère a riets Hand vun der Paulette Lenert. Op d'Fro, ob et Tensiounen tëscht dem Ministère an der Direction de la Santé gëtt, huet d'Anne Calteux geäntwert, et wier schonn interessant, wat Leit alles an e Karriärswiessel eran interpretéieren. No 8 Joer am Ministère hätt si "den Tuer do gemaach" an de Posten als Vertriederin vun der Maison de l'Europe hätt sech offréiert. Well si och schonn op der permanenter Representatioun vu Lëtzebuerg zu Bréissel geschafft huet, géing de Sujet si "passionéieren".

"Ech wëll net soen, datt et ni Tensioune gouf an deene leschte Méint. Datt wärend enger Kris d'Leit heiansdo "midd" sinn oder gereizt, well se op ganz sensibelen Dossiere schaffen", wier "méi ewéi normal". Et wier awer ni e béist Wuert gefall a jiddereen hätt sech géigesäiteg respektéiert. Si géing jidderee bewonneren, deen d'Kris nach weider geréiert, well dat wier awer eng "Knachenaarbecht".

Invité vun der Redaktioun: Anne Calteux

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.