E Mëttwoch de Moie war de Buergermeeschter vun Iechternach eisen Invité vun der Redaktioun.

Wann een mir dat do 3 Deeg virdru gesot hätt, dann hätt ech et och net gegleeft, sot den Yves Wengler, Buergermeeschter vun Iechternach, am RTL-Interview zu den Iwwerschwemmunge Mëtt Juli. D'Suitte vum ville Ree wiere ganz schwéier anzeschätze gewiescht. Et wiere ganz vill Facteure beieneekomm. Dowéinst wéilt hien och net soen, datt d'Autoritéite bei de Joerhonnert-Iwwerschwemmunge viru gutt zwee Méint versot hätten.

Et wier awer wichteg, déi richteg Léieren aus der Katastroph ze zéien. Zum Beispill missten d'Leit sensibiliséiert ginn, wéini a wéi si sech sollen op esou en Héichwaasser preparéieren. Et ginn Héichwaasserkaarten an och Peegelstänn, mä d'Leit misste léiere wéi se dat fir sech selwer aschätze kënnen. Dofir denkt d'Gemeng Iechternach driwwer no fir een Héichwaasserguide un d'Leit ze schécke mat all den néidegen Informatiounen.

Resumé Invité: Yves Wengler / Reportage: Annick Goerens

Den Yves Wengler ass och President vum SIGI, dem Syndicat intercommunal de gestion informatique, deen de Gemengen a puncto informatesch Servicer zur Säit steet. Duerch d'Corona-Pandemie, wieren d'Gemenge forcéiert gewiescht, verstäerkt op Digitalisatioun ze setzen. Zum Beispill mat online Gemengeréit via den SIGIrooms oder dem online Accès iwwer VPN op Gemenge-Donnéeën, déi dann an enger Cloud der SIGIcloud hei zu Lëtzebuerg stockéiert goufen. D'Gemenge wieren also gutt duerch dës Pandemie komm, sou eisen Invité.

Am Kontext vun der Digitalisatioun bedauert den Yves Wengler awer, dass verschidde Administratiounen nach ëmmer een „Silo-Denken“ hunn. Vereenzelt Ministèrë géingen do léiwer Produiten an d'Ausland siche goen, obwuel Lëtzebuerg ënner anerem mam SIGInova eng eege Léisung entwéckelt hätt, fir a puncto Digitalisatioun an Connectivitéit no vir ze kommen. Et géing drëm goen, dass een et fäerdeg bréngt, fir net méi mat Pabeier tëscht den Administratiounen ze kommunizéieren, mä informatesch.

Lëtzebuerg hätt déi beschten Infrastrukturen a kéint do definitiv an der Championsleague vun der Digitalisatioun mat spillen, mä dëst "Silo-Denken"géif dat verhënneren, sou den Yves Wengler.

Invité vun der Redaktioun: Yves Wengler

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.