En Donneschdeg de Moie war de "Conseiller à l'apprentissage" eisen Invité vun der Redaktioun.

Et ass en aussergewéinlecht Joer. Mir hu sou vill Léierplaze wéi nach ni. Zwou oppe Léierplazen pro Apprenti, esou datt all Dëppe misst säin Deckel fannen. Dat sot den Dan Schroeder um Donneschdeg de Moien, eisen Invité vun der Redaktioun um RTL Job- a Léierplazendag. Hien ass Conseiller à l'apprentissage bei der Chambre des Métiers a sougenannte «Matcher». Hien informéiert a beréit Betriber fir auszebilden an och Elteren a Jonker, déi interesséiert sinn un enger Léierplaz.

Déi vill Léierplazen wieren duerch staatlech Aidë fir Betriber z’erklären a well d'Period, fir ze rekrutéieren, verlängert gouf. Net iwwerall stëmmen d’Offer an d’Demande iwwerteneen.

Fir de Metzlerberuff, Plazen um Bau a bei den dräi Beruffer vum Daach feelen Interessenten. D’Leit géifen dacks net d’Carrièresméiglechkeeten a Perspektive gesinn, déi sou Beruffer offréieren, wat schued wär. Beim Autosmechanicien an an am Beräich "Esthétique" ass et de Contraire, do sinn net genuch Plaze fräi.

Fir déi ideal Ausbildungsplaz an de Beruff ze fannen, soll een oppen a flexibel sinn, sech déi richteg Froe stellen, wat engem gefält an dann „intelligent“ decidéieren. Wann d’Dramplaz schwéier gëtt, kucke wat am noosten dru kënnt. Och un d’Groussregioun soll een denken, fir d’Ausbildung oder eng Léierplaz.

D’Chambre des métiers offréiert och de „Basic Check“, wou ee rausfënnt, wat bei ee passt. Fir eng Léierplaz ze fannen, soll een och mat Zäiten u sinn, schonn am Abrëll kucken, Stagë maachen a sech op de Radar vun de Patrone setzen.

Invité vun der Redaktioun: Dan Schroeder

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.