De President vun der consultativer Mënscherechtskommissioun war e Freideg de Moien eisen Invité vun der Redaktioun.

Wann ee mat Ängschten, Beschëllegungen oder Drock fiert, ginn d'Leit éischter nach méi stuer, dat sot de President vun der consultativer Mënscherechtskommissioun, de Gilbert Pregno, e Freideg de Moien am RTL Interview, zum Sujet Impfen an Impfgéigner. Duerfir misst ee lo keen Doktorat an der Psychologie hunn.

D'Mënscherechtskommissioun hat am Kader vum leschte Covid-Gesetz scho virun negativen Auswierkungen op d'Zesummeliewen, virun enger Spléckung vun der Gesellschaft gewarnt, wann déi gratis PCR-Tester ewech falen. Hie wier e bësschen erféiert gewiescht iwwert dee Message vum Premier d'lescht Kéier an och d'Ukënnegung, datt nach méi Restriktioune kéinte kommen.

Et géife genuch Problemer am Land, déi d'Populatioun splécken, esou de Gilbert Pregno bei eis um Radio. Do misst een net nach aner Konflikter schüren! D'Regierung an d'Parlament wiere besser beroden, d'Oueren ze spëtzen a gutt nozelauschteren.

D'Mënscherechtskommissioun ass dann och kloer géint eng Impfflicht. De Gilbert Pregno huet an engems awer ënnerstrach, datt d'Impfen eng kloer Hëllef wier, fir aus der Kris erauszekommen. Mä et dierft ee lo net déi vertrauensschafend Moossnamen duerch Drock ersetzen. Soss géif ee riskéieren, déi Falsch ze treffen.

Et wieren nämlech vill Leit ënnert den Net-Geimpften, déi keng strikt Impfgéigner sinn, mä sech net sécher wieren a vläicht einfach Angscht hätten. Respektiv Leit déi a prekäre Verhältnisser liewen a sech manner Gedanken iwwert hir Gesondheet maachen.

Den Impakt vun der Pandemie wier grouss a mir misste séier do raus. De "Provisorium vun Agrëff an d'Fräiheeten" wäert leider nach laang en Impakt op eis hunn.

De Gilbert Pregno mécht sech och Suergen, wéi d'Leit den Ament matenee schwätzen. D'Veruechtung, déi elo am Ëmlaf ass, géif eist Zesummeliewen fragiliséieren.

Dat wier net gutt fir d'Demokratie. D'Demokratie, esou de President vun der consultativer Mënscherechtskommissioun, wier net d'Gesetz vun der Majoritéit mä de Schutz vun de Minoritéiten, vun deenen déi mer riskéieren ze diskriminéieren.

Invité vun der Redaktioun: Gilbert Pregno

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.