De Chef vun der Direktioun vun der Sécurité Civile am Inneministère war en Donneschdeg de Moien eisen Invité vun der Redaktioun.

De Plang fir Rettungssécherheet "plan national d’organisation des secours", kuerz PNOS huet als Zil, datt bannent 15 Minutten Hëllef op der Plaz ka sinn. De Plang ass souwäit fäerdeg an dierft geschwënn duerch de Regierungsrot goen. 67 Gemengen hunn Avisen erageschéckt, sou den Alain Becker, Chef vun der Direktioun vun der Sécurité Civile am Inneministère.

An der Haaptsaach goung et do ëm de Finanzement vum CGDIS, bei deem d'Gemenge jo d'Hallschent bäisteieren. Et wéisst een, datt d'Gemenge wéinst der Pandemie finanziell belaascht ginn, sou den Invité vun der Redaktioun Alain Becker. D'Inneministesch Taina Bofferding wäert awer bei deem bleiwen, wat lo a puncto Finanzement am PNOS virgesinn ass. Wann een d'Ziler vun deem Plang wéilt erreechen, da bräicht een déi dote Moyenen, sou den Alain Becker.

Wat eng besser Unerkennung vun de Fräiwëllegen ugeet, do hätt d'CGDIS-Gesetz schonn eng grouss Verbesserung bruecht, wéi zum Beispill d'Steierfräiheet op Indemnitéiten.

Beim schroen Héichwaasser am Juli hätt de CGDIS generell gesinn eng gutt Aarbecht gemaach. De CGDIS misst sech natierlech weider op Naturkatastrophe preparéieren, de Plang PNOS géing do déi richteg Moyene virgesinn.

Ugeschwat op en interne Mail am CGDIS no enger parlamentarescher Fro vum Piratendeputéierte Sven Clement, an där e Chef de service Drock op seng Mataarbechter gemaach huet, huet den Alain Becker en Donneschdeg de Moie gemengt, déi E-mail wier net glécklech gewiescht an Harcelement wier an alle Formen ze verurteelen.

Invité vun der Redaktioun: Alain Becker

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.