Den Haut-commissaire à la protection nationale war den Donneschdeg eisen Invité vun der Redaktioun.

Fir berouegt iwwert de Wanter ze kommen, muss den Impftaux vun de Leit iwwer 12 Joer bei 85% leien, dat sot de Luc Feller den Donneschdeg de Moien. Den Haut-Commissaire à la Protection Nationale, deen d‘Impfcampagne organiséiert, war eisen Invité vun der Redaktioun.

Et géif net deen typesche Bierger ginn, dee sech net impfe gelooss huet, esou de Luc Feller. Dofir wier et ganz schwéier se alleguer mat Informatiounscampagnen z'erreechen. Hie léisst d‘Kritik net gëllen, datt een ze vill passiv gewiescht wier an ze spéit un. Et wär vill sensibiliséiert ginn. D‘Impfung wär ee grousse Sujet an der Gesellschaft an an de Medien. Et hätt ee versicht, de Leit et sou einfach wéi méiglech ze maachen. Jiddereen hätt zum Beispill e personaliséierte Bréif kritt fir sech impfen ze loossen.

Et gëtt d‘Impfzentren – mat an ouni Rendez-vous - den Impfbus, e Méindeg fänkt eng Campagne an de Lycéen un a bei 260 Hausdoktere kéint ee sech mëttlerweil impfe loossen. Bis ewell hätten d‘Generalisten 9.000 Vaccinatioune gemaach. Dat géif gutt lafen, mä et wär ee frou, wann nach méi vum Hausdokter géif Gebrauch gemaach ginn.

Drock vum Gesetzgeber oder Leit, déi ënner Zwang gesat gi mat den neie Coronareegelen...dat gesäit de Luc Feller anescht.

An der Gesellschaft géif eng Erwaardungshaltung entstoen. 430.000 Leit hätte sech eng 1. Kéier impfe gelooss. Si hätten eppes gemaach fir sech an déi aner ze schützen. An déi géifen net onbedéngt verstoen, datt anerer sech net géifen impfe loossen.

Et géif een dat Ganzt jo och net maachen, fir d’Leit ze kujenéieren. De Virus wär numol do. Et géif ëm d’Santé publique goen. De Gesondheetssystem misst een erhalen an am Wanter wéilt een net an eng Situatioun kommen, wou d’Spideeler iwwerlaf sinn, sou den Haut-Commissaire à la Protection Nationale.

Am leschte Réckbléck vun der Santé stoung, datt 46% vun de Leit, déi sech d’lescht Woch ugestach hunn, geimpft waren. Méi wichteg wär ze betounen, datt de Gros vun de Leit an de Spideeler net geimpft ass, sou de Luc Feller. D’Zil vum Vaccin wär et virun enger schwéierer Krankheet ze schützen - an dat wär ginn. D’Prozentsätz misst een och a Relatioun setze mat geimpft oder net-geimpft an da wär de Prozentsaz vun den Net-Geimpften däitlech méi héich.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.