Eng Aktivistin vun "Youth for Climate" war e Freideg de Moien eis Invitée vun der Redaktioun.

An der Ried zur Lag vun der Natioun goufe keng konkrete Äntwerten op eis Froen a Fuerderunge genannt. Et ass méi zeréckgekuckt ginn, op dat, wat schonn erreecht gouf. Dat sot d'Lisa Urbany vu Youth for Climate. Si war um Freideg de Moien eis Invitée vun der Redaktioun.

Dass d’Klimapolitik awer relativ vir an der Deklaratioun genannt gouf, géing weisen, dass d’Prioritéite vu der Regierung sech verännert hätten. Eng méi nohalteg Politik wier elo no vir geréckelt, wat ee begréisst huet. Trotzdeem vermësst d'Aktivistin kloer Aussoen a méi éiergäizeg Klima-Ziler.

De Premier huet widderholl, dass Lëtzebuerg bis 2050 Klimaneutralitéit erreeche wëll, Youth for Climate fuerdert dëst Zil scho bis 2030. Dat hätt een der Regierung och an enger Entrevue no der Klima-Maniff vun Enn September gesot. Och do hätt een awer net wierklech konkret Versprieche gemaach kritt. Enttäuscht wier een, dass Nohaltegkeet an Ëmweltschutz net méi a Schoule soll ugeschwat ginn. Déi jonk Generatioun wier jo schonn immens oppe fir dat Thema an esou kéint een och e Mentalitéitswiessel an der ganzer Populatioun erreechen.

De geplangte Klima-Biergerrot wier an deem Sënn och eng gutt Propos, fir d’Leit méi an d’Politik anzebauen. Et sollten awer onbedéngt och Jonker ënner 18 Joer matmaachen dierfen an de Biergerrot misst och e politescht Gewiicht hunn.

Zum ëffentlechen Transport huet déi jonk Aktivistin begréisst, dass vill investéiert an ausgebaut gëtt. Ma nach wier den Zuch- a Bus-Reseau ze vill op d’Stad zentréiert. Vill Dierfer wieren immens schlecht ugebonnen, sou dass een dacks nach en Auto bréicht.

Dass CO2-Emissioune vu staatlechen Auslandsreese solle kompenséiert ginn, géing dem Lisa Urbany no net esou vill bréngen. Et wier méi eng «Scheinlösung, fir sech d’Gewësse reng ze wäschen» fënnt Youth for Climate, well d’CO2-Emissioune jo trotzdeem ausgestouss ginn. Vill méi wichteg wier et, d’Emissiounen tatsächlech ze reduzéieren.

Invité vun der Redaktioun: Lisa Urbany

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.

Wéinst technesche Problemer hu mer leider kee Video vun der Emissioun. Entschëllegt dëse Mëssel w.e.g.