Den Educatiounsminister war um Méindeg de Moien eisen Invité vun der Redaktioun.

Schüler hunn e Recht op Schoul, deemno gëtt de CovidCheck net op d'Klassesäll erweidert, dat huet de Claude Meisch de Méindeg de Moien hei op RTL deklaréiert. Den Educatiounsminister huet erkläert, datt den Zougank vu Bierger an Administratiounen net ka verwiert ginn an dat géing och fir den Zougank zur Bildung fir d'Schüler gëllen. Hien huet allerdéngs Gespréicher mat den Enseignantsgewerkschaften ugekënnegt, fir ze kucken, ob de CovidCheck awer fir déi Beschäftegt an de Schoulen an an aneren Administratioune vum Enseignement agefouert ginn oder net. "Ech denke schonn, datt mer op enger Rei vu Plazen och CovidCheck-Elementer wäerten hunn, mee de Klassesall, dovunner sinn ech fest iwwerzeegt, däerf dozou net gehéieren.", sou de Claude Meisch.

D'Enseignantsgewerkschaft Féduse vun der CGFP hat am August nach selwer de CovidCheck fir d'Schoule gefuerdert. Dowéinst ass de Claude Meisch och iwwerrascht iwwert de Widderstand vun der CGFP, zesumme mam OGBL a mam LCGB géint d'Erweiderung vum CovidCheck an de Betriber (vum 1. November u kënne Betriber decidéieren). Dem Educatiounsminister no wier net alles "schwaarz a wäiss" an et misst ee weider zesummen diskutéieren. Op d'Remark vun de Gewerkschaften, d'Regierung hätt éischter sollen eng besser Impfcampagne organiséieren, amplaz elo d'Impfflicht zur Hannerdier anzeféieren, sot de Claude Meisch, d'Impfcampagne wier a sengen Ae gutt gelaf, soulaang den Interessi vun de Leit och do gewiescht wier. Lues a lues misst een awer och der "Majoritéit vun de Leit" entgéintkommen, déi "alles richteg" gemaach hätten, andeems se sech impfe gelooss hunn. "Wann eis vläicht heiansdo virgeworf gëtt, an der Vergaangenheet hätte mir net séier genuch reagéiert, da gëtt eis elo virgeworf, mir wieren ze stiermesch", sou de Claude Meisch. Et bräicht een elo awer kee Sträit, mee méi Impfungen.

Keng Suerg ëm d'Maison Relais

Am Interview de Méindeg de Moie goung och Rieds iwwert d'gratis Kannerbetreiung, déi et vun der nächster Rentrée u fir den Accueil an de Maison Relaise soll ginn. D'Suerg, datt d'Gemengen net genuch Plaz an hire Maison Relaise wäerten hunn, wann d'Gratuitéit d'Demande géing an d'Luucht drécken, huet den Educatiounsminister net gedeelt. Dat wier och gefaart gi wéi 20 Stonne gratis Kannerbetreiung an de Crèchen agefouert gi war, mee et wier "an deem Mooss net de Fall" gewiescht. Seng Erfarung wier déi, datt net just de Präis determinéiere géing, ob Elteren hir Kanner an d'Maison Relais unmellen oder net.

Invité vun der Redaktioun: Claude Meisch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.