En Dënschdeg de Moie war de President vum "Groupement Pétrolier" eisen Invité vun der Redaktioun.

Et ass onméiglech viraus ze soen, ob d'Energiepräisser nach klammen. Wierklech Enkpäss beim Sprit oder Brennes misst een net fäerten. Et wär "masseg" do. Dat sot de President vum Groupement Pétrolier Romain Hoffmann als eisen Invité vun der Redaktioun. D'Präishausse géif nach zréckgoen op d'Corona-Pandemie.

D’Demande no Energie wier doduerch staark zeréckgaangen, d’Produktioune goufen erofgefuer. Elo géif et daueren, dat nees ze relancéieren an der aktueller, méi héijer Demande unzepassen. Weider war et och e kale Wanter an e kaalt Fréijoer. An et hätt wéineg Sonn a Wand fir erneierbar Energien ginn.

D’Tankstellen hei am Land géifen aktuell mat de Präishaussen net onbedéngt méi verdéngen. D'Bruttomargen wiere jo vum Staat festgeluecht. De Gros vum Präis maachen Taxen an Accisen aus, beim Diesel sinn dat 43 %, beim Bensin 53%. Wa méi mat Kreditkaart bezuelt gëtt, ginn d’Margen nach weider erof, sou de Romain Hoffmann.

D’lescht Joer hätt een 21% manner Bensin an Diesel verkaf. An der éischter Hallschent vun dësem Joer hätt een e Plus gehat vun 8%. Mä um Niveau vun 2019 wär een nach net.

D’Mënschheet kann net esou weider maachen, wéi bis ewell mat de fossille Energien, dat wéissten d’Pëtrolskonzerner an dat weess och de President vum Groupement Pétrolier. D’Pëtrolskonzerner, respektiv Tankstellen, wiere prett, mat op de Wee vun der energetescher Transitioun ze goen.

Zum Beispill mat Lued-Statioune fir d'Elektromobilitéit: "lueden" amplaz "tanken". Oder Batterien fir elektresch Vëloen a Scooteren.

D’Tankstelle ginn ëmmer méi e Service-Provider, speziell fir d’Mobilitéit.

An de Shop ass ganz wichteg fir d’Tankstellen. 50% vum Revenu oder souguer méi gëtt domat gemaach, sou de Romain Hoffmann.

Invité vun der Redaktioun: Romain Hoffmann

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.