E Mëttwoch de Moie war de fréieren CSV-President, deen aktuell Ugekloten an engem Prozess ass, eisen Invité vun der Redaktioun.

D'Fuerderung vun 9 Méint Prisong mat Sursis ass genee esou surreal wéi de Prozess. De Requisitoire vum Vetrieder vum Parquet koum aus enger anerer Welt, dat sot de fréieren CSV-President Frank Engel de Mëttwoch de Moien als eisen Invité vun der Redaktioun. En Dënschdeg ass de Prozess ëm d'Affär CSV-Frëndeskrees no 4 Deeg op en Enn gaangen, d'Urteel ass den 9. Dezember.

De Frank Engel fillt sech vum Parquet net gerecht behandelt, mä ëmmerhi wär et jo nach keen Urteel. De Procureur hätt net op een Argument vun der Verdeedegung reagéiert. Hien hätt vun Ufank u gewosst, datt déi fréier Spëtzt vun der Partei eng kriminell Vereenegung wier, sou de Frank Engel.

De fréieren CSV-President bleift derbäi, datt hien an och déi aner Ugeklote sech näischt zu Schold komme gelooss hunn. D'Vitess vun der Enquête a wéi séier et zum Prozess koum, hätt d'Lëtzebuerger Justiz nach net erlieft, mengt hien.

Den deiere Büro vu 25.000 Euro vum fréieren CSV-President Marc Spautz an de Verkaf un d’Fraktioun waren och e Sujet am Interview. De Frank Engel huet sech op en Neits gewonnert, datt dat net am finale Rapport vun der Cour des comptes iwwer d’Finanze vun de Parteien zréckbehale gouf. Op Nofro hin huet hien zouginn, och sou en deiere Büro, "wéi et schéngt", gehat ze hunn. Mee wann een hie gefrot hätt, "wär e bei den Ikea gaangen".

Den Ament verdéngt hie Sue mat Berodung a Konzepter schreiwen am Beräich Waasserstoff. Loscht op Politik hätt hien am Prinzip nach, mee fir eng eege Partei bräicht ee Geld an hien hätt keent. Hie wéilt sech och net eleng en scène setzen. Hie wéilt keng Frank-Engel-Partei. Mat der CSV hätt hie selbstverständlech ofgeschloss. Mat deene Leit, déi hien denoncéiert hätten, kéint hien net méi.

Drop ugeschwat, ob hie sech net bei de Pirate kéint gesinn, fir Politik ze maachen, sot de Frank Engel, hie wär 26 Joer laang an der CSV gewiescht, zwee dovunner als President. Hie wär net haaptberufflech Pirat. Et wär net esou, datt hie sech näischt kéint virstellen an et wéisst een net, wéi alles ausgeet.

D'Verfassungsreform war e weidere Sujet. Hie wär ëmmer fir de Referendum gewiescht, huet de Frank Engel betount. De Revirement vun der CSV 2019 hätt hien net gewollt, mee hien hätt dat gemaach, wat seng Partei deemools am Nationalrot decidéiert huet. Den Zickzack vun der CSV nennt hie "befremdlech", mee à la base wär et awer richteg, fir de Verfassungsreferendum ze maachen.

Invité vun der Redaktioun: Frank Engel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.