En Donneschdeg de Moie war den CSV-Deputéierten eisen Invité vun der Redaktioun.

„Wann et stëmmt, da fannen ech et ganz hefteg." Dat war d'Reaktioun vum Paul Galles op d'Plagiatsaffär vum Premier Xavier Bettel am RTL-Interview. Den CSV-Deputéierten huet selwer eng Doktorsaarbecht vu knapp 600 Säite geschriwwe mat 2.000 Foussnotten. „Dat kann eigentlech net sinn, dass et eng Aarbecht gëtt, wou keng eenzeg Quell uginn ass, also wou ee seng Saachen hier huet a wouriwwer een nogeduecht huet." Hie géing och net verstoen, dass elo Leit géinge soen, dass dat virun 20 Joer net esou seriö geholl gi wär. Virun 20 Joer wär Wëssenschaft och net domm gewiescht, sou den Invité.

De Paul Galles ass och ee vun zwee Deputéierten, deen op der Weltklimakonferenz zu Glasgow, der COP26, derbäi ass. Als Parlamentarier hätt een do d'Aufgab, d'Regierungen ze drécken, fir méi ze maachen a puncto Klimaschutz. Sécher géif et op dëse Konferenzen - wéi d‘Greta Thunberg et scho formuléiert huet - vill „Bla-Bla“ ginn. Ma, et bräicht een awer, Zäit fir ze verhandelen, sech z‘erklären a fir Kompromësser ze fannen.

An och wann d'Ziler vum Paräisser Klima-Accord  wuel net wäert kënnen erreecht ginn, d'Weltklimakonferenz zu Glasgow wier eng weider Chance fir virun ze kommen. Zum Beispill bei den Negociatiounen iwwert den Emissiounshandel oder bei der finanzieller Ënnerstëtzung fir de globale Süden a Saache Klimaschutz. Dofir bräicht een den Experten no bal 100 Milliarden Euro d‘Joer.

Den CSV-Vizepresident gëtt dann och zou, dass den Ament e schwieregen Zoustand an senger Partei wier, awer dat, wat géing feelen, wär Zäit fir sech z‘erklären. A puncto Prozess an der Affär CSV-Frëndeskrees, zitéiert den Invité e Grondsaz: „Fir e Sträit brauch et der ëmmer 2." Dofir wier et natierlech ongënschteg, wa just eng Geschicht dobausse wier, een Narrativ an da géing ëmmer just op eng Säit geklappt ginn. Dat géing awer net stëmmen, do wär een aneren Equiliber am Narrativ, sou de Paul Galles. A Parteie géing diskutéiert a gestridde ginn, hie géing just hoffen, dass dat an Zukunft bannent der Partei bleift an net géing an d'Ëffentlechkeet gedroe ginn, sou nach eisen Invité.

Invité vun der Redaktioun: Paul Galles

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.