E Freideg de Moie war den Epidemiolog vun der Direction de la Santé eisen Invité vun der Redaktioun.

Et konnt ee sech erwaarden, dass d'Neiinfektiounen elo klammen, och wa scho 75 Prozent vun der Populatioun geimpft sinn. An der Lescht wier d'Zuel bei de Leit tëscht 45 a 75 Joer nees an d'Luucht gaangen an dat géing och méi Hospitalisatioune matsechbréngen. Dofir kéint een dann elo och vun enger 4. Well schwätzen, erkläert den Dr. Joël Mossong am RTL-Interview. D'Impfe wier nach ëmmer déi wichtegst Mesure. Aktuell läit den Impftaux bei 75 Prozent (bei der Populatioun vun 12 Joer un).

Den Epidemiolog vun der Santé wollt awer kee Chiffer nennen, deen ee misst erreechen, well ee mëttlerweil wéisst, dass d‘Protektioun vun de Vaccine mat der Zäit ofhëlt an drëtt Impfungen dowéinst wichteg wieren. Och wann de Vaccin mat der Zäit net méi sou gutt géint eng Infektioun schützt, sou wär en awer wichteg, well den Impfstoff d'Leit laangfristeg viru schlëmme Krankheetsverleef protegéiert.

Am Grand-Duché gouf jo mëttlerweil schonn mat enger 3. Booster-Impfung bei Leit iwwer 75 Joer ugefaangen an aktuell géingen och Diskussiounen am Conseil supérieur des maladies infectieuses lafen, fir dat och nach op de Rescht vun der Populatioun z'erweideren. A ganz wichteg wär do och dem Fleegepersonal an de Spideeler an Altersheemer d‘Méiglechkeet, fir eng 3. Booster-Impfung ze ginn. Et géing een nämlech gesinn, dass sech do nees méi Personal ustécht, sou den Dr. Mossong.

Nach wier och net gewosst op d'Booster-Impfung an de CovidCheck mat afléisst. Dat heescht, ob een muss eng 3. Kéier geimpft ginn, fir säin passe sanitaire ze behalen. Do géif gekuckt ginn, wat op europäeschem Niveau decidéiert gëtt.
Den Dr. Mossong vun der Santé wollt och net ausschléissen, datt nees méi streng Corona-Mesuren decidéiert ginn, wann d'Situatioun nees méi schlëmm gëtt. Och wann dat fir den Ament net virgesi wier.

Invité vun der Redaktioun: Dr. Joël Mossong

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.