E Mëttwoch de Moie war de Verfassungsexpert Luc Heuschling eisen Invité vun der Redaktioun.

Der Regierung hir Argumentatioun, fir de Referendum falen ze loossen, ass net valabel. Dat sot de Verfassungsspezialist vun der Uni Lëtzebuerg, Luc Heuschling, de Mëttwoch am RTL-Interview.

Och wann een de Kuch a véier deelt, bleift et nach ëmmer ee Kuch, iwwert deen hätt ee kënnen ofstëmmen, sou de Professer Heuschling. Perséinlech wier hie fir e Referendum, well dee wier gutt fir d’Demokratie.

Hie mengt awer net, datt déi 25.000 Ënnerschrëften zesumme kommen. Wann dat esou wier, da géing et vun der Prozedur a vum Timing hier schwiereg ginn. Déi 25.000 Ënnerschrëfte vun der Biergerinitiativ dierften och net verwiesselt gi mat der aktueller Petitioun um Chambersite.

D'Verfassungsrevisioun wier wichteg, well dat aktuellt Dokument wier al an net gutt geschriwwen. Ma dat, wat elo um Dësch läit, wier awer nëmmen eng moderat Moderniséierung, kee Quantesprong. Hie mengt, datt ee villes hätt kënne besser maachen, zum Beispill a Saache groussherzoglechen Haff. De Grand-Duc hätt am aktuelle Projet nach ëmmer d’Immunitéit.

Wat d’Plagiatsreprochë géint de Staatsminister ugeet, sot de Luc Heuschling, datt hie virun allem schockéiert wier iwwer Aussoen, déi den Héichschoulminister Claude Meisch soll gemaach hunn, de Minister hätt en Ënnerscheed gemaach tëscht Master an Doktorat an domat wier hie guer net d'accord, sou de Luc Heuschling. Hie selwer géing senge Schüler op alle Fall vun Ufank u weisen, wéi ee korrekt zitéiert.

Invité vun der Redaktioun: Luc Heuschling

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.