En Dënschdeg de Moie war d'Direktesch vum Cercle de Coopération eis Invitée vun der Redaktioun.

Den Impakt vun der Pandemie wier wuel um Terrain ze spieren, ma déi meeschte Projeten hätten awer kënne relancéiert ginn an alles an allem wier d'Kooperatioun immens resilient gewiescht. Dat sot d'Direktesch vum Cercle de Coopération des ONG, Nicole Ikuku, en Dënschdeg de Moien als eis Invitée vun der Redaktioun. D'ONGen hätte sech nawell gutt adaptéiert a sech och vill missen ëmstellen, mä mat Kreativitéit a Flexibilitéit hätt een och eng ganz Rei nei Projete kënne lancéieren, trotz der Pandemie.

A puncto Finanzen huet d'Nicole Ikuku erkläert, dass d'Done lescht Joer relativ stabel bliwwe wieren, d'Leit hätte sech solidaresch gewisen, mä dëst Joer géingen d'Keese vun den ONGe lues a lues ufänken, komplett eidel ze ginn, well een zolidd Abousse bei de Recetten hätt. Wärend 1-2 Joer konnte kaum ëffentlech oder kulturell Aktivitéite gemaach ginn, wou een normalerweis awer vill Fongen erakritt, erkläert d'Direktesch. E sprangende Punkt dobäi ass, dass eng ONG, déi vum Ministère konventionéiert an deemno mat finanziell ënnerstëtzt ass, awer 20-40 Prozent Eege-Finanzéierung muss op d'Bee stelle kënnen. De Ministère hätt sech awer ganz flexibel gewisen an dat hätt vill gehollef.

En Vue vun der Debatt an der Chamber nächst Woch iwwert d'Kooperatiounspolitik, huet de Cercle iwwerdeems 14 Recommandatioune fir déi nächst zwee Joer vun der Legislatur ausgeschafft, esou d'Invitée. Ënner anerem soll gekuckt ginn, fir d'Mënscherechter an den Entreprisen um Terrain besser ze respektéieren. Do ënnerstëtzt de Cercle d'Initiative vum Liwwerkettegesetz. Eng aner Recommandatioun vum Cercle un d'Regierung ass et, fir kleng Familljebetriber an der Landwirtschaft z'ënnerstëtzen, amplaz vu groussen Agro-Businessen, sou d'Direktesch vum Cercle de Coopération des ONG.

D'Direktesch vum Cercle de Coopération des ONG ass zouversiichtlech, dass Lëtzebuerg de Courage huet, fir dës Recommandatiounen ëmzesetzen. Mir wäre mat engem 1 Prozent vum PIB, deen an d'Entwécklungshëllef gestach gëtt, e Virbild fir vill aner Länner, sou nach d'Nicole Ikuku.

Invité vun der Redaktioun: Nicole Ikuku

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.