E Mëttwoch de Moie war d'Ombudsman Claudia Monti eis Invitée vun der Redaktioun.

Zanter engem gudde Joer gouf de sougenannten ad-hoc-Expertegrupp, deen d'Regierung mat Vertrieder aus verschiddene Beräicher am Ufank vun der Pandemie zesummegesat hat, fir d'Konsequenze vun der Pandemie op d'Gesellschaft z'analyséieren, net méi vu Blo-Rout-Gréng zesummegeruff. Eppes, wat d'Ombudsman Claudia Monti en Mëttwoch de Moie an der Emissioun bedauert huet.

Si war ee vun aacht Membere vum ad-hoc-Comité. Et hätt een der Regierung sécher eng Rei interessant Saachen ze soe gehat. Verschidde Leit hätten elo an der Pandemie mol d'Mënscherechter entdeckt, géife sech an den Eck gedréckt fillen an dat misst och thematiséiert ginn, huet d'Claudia Monti festgestallt.

Hei wieren och vläicht zousätzlech Erklärungen néideg, firwat verschidde Restriktiounen néideg sinn, a firwat verschidde Kriticke vläicht och net sou enk ze gesi sinn. Dat géif zwar geschéien, mä vläicht nach net genuch, sou d'Ombudsman, déi betount huet, wéi wichteg Transparenz a Kommunikatioun am aktuelle Kontext wier.

D'Claudia Monti huet d'Beispill vum Dateschutz genannt. Leit géifen elo Problemer domat hunn, wann de Restaurateur hiren Numm beim CovidCheck gesi géif. Datt een awer och bis elo säin Numm gesot huet, fir en Dësch ze reservéieren, hätt bis elo kee gestéiert. Hei wier de Leit vläicht e bëssche gehollef, wa verschidde Saache géife relativiséiert ginn, och um Niveau vun der Kommunikatioun. Do hätten d'Mënscherechtler vläicht eppes kënnen dozou bäidroen.

"Äntwert de Leit"

D'Ombudsman huet un d'Ministèren an d'Verwaltungen appelléiert, de Leit op hir vill Froen ze äntweren, déi se aktuell a puncto Covid hunn. Dat wier dat Eenzegt, wat elo géif hëllefen. Déi Geimpfte wéilten hir Fräiheete rëm, déi Net-Geimpfte wéilte berouegt an net diskriminéiert ginn. Hei wier d'Regierung gefuerdert, fir dës Persounen ze rassuréieren an hinnen d'Situatioun op eng verständlech Aart a Weis z'erklären.

Si kéint duerfir och mat Experten zesummeschaffen, vläicht och mat neie Leit, déi bis elo nach net sou zur Sprooch komm sinn. An enger aussergewéinlecher Situatioun wéi dëser, déi mer bis elo nach ni haten, misst een ëmmer rëm bei d'Leit goen, op den Terrain, sot d'Claudia Monti. D'Regierung misst dowéinst weider um Ball bleiwen, ëmmer nees op d'Leit zou goen.

Si selwer goufe beim Ombudsman an de leschte Méint mat ville Froe konfrontéiert, déi iwwert de Kompetenzberäich vum Mediateur erausgaange sinn. D'Claudia Monti erkläert sech dat deels doduerch, datt verschidde Persoune bei deenen aneren Instanzen net weider komm sinn an hir Doleancë beim Ombudsman méi séier gelauschtert goufen. Si hätten deen Ament probéiert, déi betraffe Leit bei déi zoustänneg Servicer ze dirigéieren.

Perséinlech hätt si festgestallt, datt an der Lescht vill Leit sech mat aarbechtsrechtleche Froe wéinst dem CovidCheck un d'Servicer vum Ombudsman adresséiert hunn. Do géif ee mierken, datt d'Onsécherheet enorm grouss wier.

Aschnëtter ginn am Prisong méi schlëmm erlieft wéi dobaussen

Déi aktuell Corona-Restriktiounen am Prisong wieren net einfach fir d'Prisonéier, sot d'Claudia Monti. Si géife sech déi nämmlecht Froe stellen, wéi jiddereen. Ma wann een agespaart ass, géif ee Restriktiounen nach méi schlëmm erliewen, wéi dobaussen. Méi Reklamatioune krut d'Ombudsman, déi och fir déi extern Kontroll vum Prisong zoustänneg ass,  awer net, wat si u sech iwwerrascht.

Den Detenue géif wéinst der Coronasituatioun besonnesch de perséinleche Kontakt feelen, well d'Visitten den Ament limitéiert sinn an nëmmen hanner Plexiglas organiséiert kënne ginn.

D'Prisongsverwaltung huet wéinst dem aktuelle Coronacluster déi sanitär Restriktioune bis de 7. Dezember verlängert. Der Ombudsman no géif d'Verwaltung hiert Bescht maachen, fir d'Situatioun ze geréieren. Mat ronn 530 Prisonéier zu Schraasseg wier de Prisong den Ament awer sou staark beluecht, datt et schwéier wier, wierklech all Mesuren ze huelen, déi néideg wieren.

An enger éischter Impfcampagne hat sech grad mol een Drëttel vun der Prisongspopulatioun géint Covid impfe gelooss. Antëscht wieren awer weider Efforte gemaach ginn, sou d'Claudia Monti. Och de Booster wier elo am Prisong disponibel fir jiddereen, deen d'Konditiounen erfëllt. De Prisong géif hei probéieren, proaktiv ze reagéieren.

Mannerjäreger am Erwuesseneprisong: Do gëtt et Zäit, e "Booster" ze maachen

An dësem schwierege Kontext sinn den Ament och zwee Mannerjäreger zu Schraasseg am Erwuesseneprisong. De Prisong wier hei zwar kee Virworf ze maachen, si wiere virun e Fait accompli gesat ginn a géifen och probéieren, dat Bescht aus der Situatioun ze maachen. Mä de Prisong wier einfach net ausgeriicht fir Mineuren, betount d'Ombudsman, déi guer net frou ass mat der aktueller Situatioun.

An dësem konkrete Fall handelt et sech ëm zwee sougenannt "mineurs accompagnés" déi am Ufank als Erwuessener ugesi goufen. Eng Géigenexpertise ass awer antëscht zur Konklusioun komm, datt si nach keng 18 Joer hunn. Nawell solle si bis Mäerz zu Schraasseg bleiwen. Véier aner Mineure sinn antëscht allerdéngs vum Kuelebierg an d'Unisec op Dräibuer komm.

Fir d'Claudia Monti weist déi aktuell Situatioun, wéi dréngend d'Reform vum Jugendschutzgesetz gebraucht gëtt. Et wier néideg, datt hei e "Booster" géif kommen, sou d'Invitée vun der Redaktioun. Virun allem, well Lëtzebuerg eng éischte Kéier Member vum UNO-Mënscherechtsrot zu New York gëtt.

Invitée vun der Redaktioun: Claudia Monti

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.