En Dënschdeg de Moie war de Vizepremier a Verdeedegungsminister eisen Invité vun der Redaktioun.

Den Objektiv vun der Regierung ass "d’Gesellschaft weider funktionéieren ze dinn, an awer dem Gesondheetsschutz an der Iwwerbelaaschtung vun de Spideeler kënne Rechnung ze droen." Dat sot de grénge Vizepremier François Bausch en Dënschdeg de Moien am RTL-Interview. Beim Choix vun de Mesurë géint de Covid géing keen an der Regierung deen aneren ausbremsen, mä "jiddereen ass an dëse Froen ëmmer zerrappt". D’Verschäerfung vum CovidCheck oder nach d’Verkierzung vun der Gültegkeet vun den Tester déi d’Regierung e Méindeg proposéiert huet, dat wieren natierlech schwéier Decisiounen, well se Fräiheeten aschränken. "Mir sinn all midd an hunn d’Flemm", sou de François Bausch.

D’Regierung géing awer hiert Bescht maachen an "unhand vun de wëssenschaftlechen Donnéeën, déi mer hunn a vun der Aschätzung déi et ebe gëtt, hei zu kucken duerch de Wanter ze kommen". Dat Wichtegst wier der Regierung no eben d’Impfung. Och wann domadder de Virus net verschwënnt, sou ginn d’Leit viru méi schwéiere Verleef protegéiert an d’Spideeler manner belaascht.

Ugeschwat op eng Impfflicht, sot de François Bausch et soll een net mat Ängschten operéieren, mä d’Leit iwwerzeegen an zesummenhalen. Hie géing op jidder Fall dovunner ausgoen, datt d’Leit géinge gesinn "wat ronderëm passéiert a sech iwwerzeege loossen". Eng Impfflicht kéint een och a sengen Aen net vun haut op muer aféieren.

Firwat musse geimpfte Leit net nees méi Tester maachen, sou wéi zum Beispill d’Piraten an déi Lénk virschloen? D’Regierung wéilt sech op d’Impfung konzentréieren, sou de grénge Vizepremier. Hien huet als Beispill e Restaurant mat 30 Leit genannt: wann do jidderee geimpft ass a sech awer ugestach gëtt, dat wier d’Chance 90% méi kleng datt een am Spidol lant. De François Bausch huet awer betount "mir hu jo net gesot et soll net méi getest ginn". D’Regierung huet jo appelléiert, datt d’Leit sech sollen testen, wa se zum Beispill fir Chrëschtdag Famill besichen, a virun allem wa se a Kontakt mat vulnerabele Leit hunn. Donieft gëtt an der Schoul méi getest an an den Alters- a Fleegeheemer.

Wat den «3G» op der Aarbecht ugeet, dee Mëtt oder Enn Januar obligatoresch gëtt, do géing nach am Detail mat de Sozialpartner diskutéiert ginn fir ze kucken, datt dat gutt fonctionéiert. Dat beim CovidCheck och eng Identitéitskontroll soll kënne gemaach ginn, dat wier dem Francois Bausch no wichteg. Et géing net drëms goen en Iwwerwaachungsstaat ze maachen, mee fir iwwert de Wanter ze kommen.

Invité vun der Redaktioun: François Bausch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.