E Mëttwoch de Moie war den DP-Generalsekretär an Deputéierten eisen Invité vun der Redaktioun.

Et kéint ee net vu Flemm schwätzen, mä d'Pandemie wier schonn eng Belaaschtung och fir d'Politik. Dat sot den DP-Generalsekretär an Deputéierte Claude Lamberty e Mëttwoch de Moien am Kontext vun den annoncéierte Récktrëtter vun de Ministere Gramegna, Kersch a Schneider. D’Annonce vun der Demissioun vum Finanzminister Pierre Gramegna wier iwwerraschend komm an d’DP wier net frou doriwwer. De Claude Lamberty sot, hie kéint definitiv garantéieren, datt et keng Kris oder keen Eclat oder Problem géif ginn, mä et misst een de Choix, méi Zäit mat der Famill wëllen ze hunn, "mënschlech respektéieren". Iwwer méiglech Nofollger fir de Pierre Gramegna konnt oder wollt de Claude Lamberty e Mëttwoch näischt soen.

Dem DP-Deputéierten no géing d’Regierung trotz den Departe vun dräi Ministere weider gutt kënne schaffen. Op d’Fro, wien no all den Departen déi lescht Joren, an nodeems de Xavier Bettel duerch seng Plagiatsaffär ugeschloen ass, d'Zuchpäerd bei der blo-rout-grénger Koalitioun wier, huet hie geäntwert, d’Regierung wier ëmmer eng Ekipp gewiescht. "An déi Ekipp, déi steet", sou de Claude Lamberty, och wa se eng "schwiereg Zäit" hätt mat der Pandemie.

Mä d’Pandemie wier fir jidderee schwiereg, fir d’Politiker, mä och fir d’Bierger, fir d’Dokteren an d’Fleegepersonal oder nach fir d’Beamten. Alleguer hunn hir Aarbecht gemaach a se maache se och weider, huet de Claude Lamberty betount. Och wann d’Regierung wéinst dem finanziellen Impakt vun der Pandemie keng Steierreform wäert maachen, sou hätt d’Koalitioun nach vill Projeten, sou den DP-Generalsekretär. Hien huet als Beispiller d’Investissementer an d'Educatioun esou wéi an de Beräich Famill genannt, mä awer och nei Mesuren am Beräich Logement, nei Sozialleeschtungen, wéi de gratis Museksunterrecht, an de Beräich "work-life balance", also dem Equiliber tëscht Aarbecht a Liewen, wou et "eis absolut ënnert den Neel brennt".

De Claude Lamberty ass och op d’Sonndesfro agaangen, aus där ervirgeet, datt d’DP vun 12 op 9 Sëtzer am Parlament kéint falen, iwwerdeems d'ADR an d'Piraten béid jee 7 Sëtzer kréichen. D’Onzefriddenheet wier eescht ze huelen, mä op der anerer Säit géing aus de verschiddene Sondagen déi lescht Woch och ervirgoen, datt vill Leit zefridde mat der Regierung wieren an d’Regierungsvertrieder net ofgestrooft géinge ginn. Also wier d’Wouerecht dem Claude Lamberty no "iergendwou dotëscht".

Invité vun der Redaktioun - Claude Lamberty

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.