E Freideg de Moie war den Deputéierte vun de Piraten eisen Invité vun der Redaktioun.

Ech hu keng Angscht, datt mer 7 gutt Leit hätte fir Responsabilitéit z‘iwwerhuelen. Dat sot de Sven Clement e Freideg de Moien als eisen Invité vun der Redaktioun. De Piraten-Deputéierten huet op d’Sonndesfro reagéiert, wou d’Pirate 5 Deputéiert géife bäi gewannen an am ganzen da 7 Sëtz an der Chamber géinge kréien. Et hätt ee sech mëttlerweil en Numm gemaach, an dofir wier et och méi einfach Leit mat op d’Lëschten ze kréien.

Konsequent Oppositiounspolitik kënnt gutt un
D’Piraten wieren hirer Linn trei bliwwen, mengt de Sven Clement. Dobausse bei de Leit géing et een Appetit ginn, fir eng konsequent Oppositiounspolitik. Et géing ee villes hannerfroen, ouni ëmmer just géint alles ze sinn. D’Sonndesfro wier och just en Trend, deen een zwar géif bestätegen an der Aarbecht, déi ee mécht, mä hie wéilt sech hidden, dat als eng Realitéit ze gesinn. Et wéilt een net den nämmlechte Feeler maache wéi eng CSV 2018, déi mat 29 Sëtz an de Sondage gestart waren, a bei 21 opgehalen hunn.

Drock op Politiker wiisst

De perséinlechen Drock op d’Politiker wier an der Pandemie ëmmer méi grouss ginn, souwuel fir d’Majoritéit wéi fir d’Oppositioun. Den Toun géif ëmmer méi rau ginn. Hien hätt haut nach keng Angscht, mä Suerge géif ee sech awer maachen. Dat géif een net éiweg aushalen, sou de Sven Clement.
Wann hie géif gesinn, datt mëttlerweil virun de Wunnengen vu Regierungsmemberen demonstréiert gëtt, géif him dat Gedanke maachen. Dat géif e bëssen ze wäit goen.

„Wat e Brach“

Op fragwürdeg a provokant Aussoe vum ADR-Deputéierten Roy Reding ugeschwat, dee wëll streiken, zum Krankeschäin oprifft an de Virus wëll aus Südafrika matbréngen, war de Commentaire vum Pirat: "Wat e Brach!" Wéi kéint e Volleksvertrieder sou eppes vu sech ginn. Et misst een net mat allem d’Accord sinn, mä dat dot géif net goen. De Roy Reding wier och den eenzegen Deputéierten an der Chamber, deen net geimpft ass an dee refuséiert eng Mask unzedoen.

De Sven Clement sot nach, datt hien Doktere beim Parquet denoncéiert hätt, déi Impfcertificaten géint Bezuelung (150 Euro) ausgestallt hunn u Leit, déi awer guer kee Vaccin kruten. Esou kriminell Machenschaften kéint hien net toleréieren.

Invité vun der Redaktioun: Sven Clement

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.