E Méindeg de Moie war déi zukünfteg Finanzministesch eis Invitée vun der Redaktioun.

Et schéngt, wéi wann d'Erausfuerderunge mech géife sichen. Dat sot d'Yuriko Backes am RTL-Interview um Méindeg de Mueren. Dass si déi éischt Finanzministesch gëtt, dierft eigentlech keng Roll spillen, ma et wier awer gutt, datt do wou Decisioune geholl ginn, och Fraen eppes ze soe kréichen. Chiffere vun der UNO géinge weisen, dass just 11  Prozent vun de Finanzminister-Posten vu Frae besat wieren. Do géingen awer Decisioune fir déi ganz Gesellschaft geholl ginn, an déi bestéing zu ronn 50 Prozent aus Fraen, sou d'Yuriko Backes.

Si hätt vill Experienzen um europäeschen an internationale Parquet kënne sammelen. Si kënnt aus enger diplomatescher Carrière a war net just déi éischt Fra als Cheffin vun der Vertriedung vun der EU-Kommissioun hei zu Lëtzebuerg, ma och diplomatesch Beroderin ënnert de Premierministeren Juncker a Bettel, déi si op all déi europäesch Conseilen an an den Eurogrupp begleet huet. An och an hirer aktueller Funktioun als Maréchale de la Cour um Haff. Aus deenen Erfarungen hätt si vill geléiert.

De Wiessel vum Haff an de Finanzministère
Den Job opzeginn, fir an de Finanzministère ze wiesselen, wier keng einfach Decisioun gewiescht. Si hätt gär um Haff geschafft a vill Neierung op d'Schinne bruecht. Elo kéint si verschidde Projete leider net ofschléissen, déi wäre fir hire Successeur. Wien dat gëtt, kéint si net soen. Si hätt dem Grand-Duc awer gesot, dass si natierlech géing zur Verfügung stoen, wann hie wéilt doriwwer schwätzen.

Mir liewen an enger Zäit vun Poly-Krisen
Inakzeptabel! Sou huet d'Yuriko Backes d'Eskalatioun vu Gewalt bei der Demonstratioun géint d'Corona-Politik genannt. Aggressivitéit, Haass a Vandalismus wieren een „No-Go“. Et géif si awer nach méi motivéieren, fir sech an der Politik, fir d'Wuel vum Land an am Interêt vun eiser Gesellschaft ze engagéieren.

Mir liewen an enger Zäit vun Poly-Krisen: déi ekonomesch a finanziell Kris, den Terrorismus, d‘Migratiounskris, d‘Klimakris an elo eng sanitär Kris. Si géing verstoen, dass dat d'Leit géing veronsécheren. Do géinge mer als Gesellschaft viru groussen Defien stoen, an do wier d‘Politik gefuerdert, fir déi richteg Léisungen ze fannen. A wa si do och just e bësse kéint zu enger besserer Gesellschaft bäidroen, da géing si sech dofir engagéieren.

Firwat de Schrëtt an d'DP ze goen?

Bis ewell wär et fir si ëmmer extrem wichteg gewiescht, fir politesch neutral ze sinn, och wéinst deene Posten déi si hat, sou d‘Yuriko Backes. Déi Fro an eng politesch Partei ze goen, hätt sech och iwwer d'Joren ëmmer nees gestallt, mä natierlech wier et e Prozess gewiescht an dës Decisioun wär scho méi laang an hirem Kapp geräift, ier se se schlussendlech geholl hätt, sou d‘Invitée. D'Yuriko Backes geet 2023 dann och mat fir d‘DP am Zentrum mat an d'Walen. Prioritéit wier awer elo fir d'éischt mol fir sech an hiren neien Job als Finanzministesch eran ze schaffen.

Invité vun der Redaktioun: Yuriko Backes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.